उत्तर प्रदेशातील लखनौमधून एक खळबळजनक घटना घडली आहे. शनिवारी रात्री टिकैतराय तलाव पोलीस ठाण्यापासून काही पावलांवरच निर्भय समाजकंटकांनी भाजप युवा मोर्चाचे नेते महाराज चेतन तिवारी उर्फ ​​श्याम चेतन यांच्यावर गोळीबार केला. समाजकंटकांनी चेतनवर तीन गोळ्या झाडल्या, त्यापैकी एक त्यांच्या कमरेत लागली.

रक्तबंबाळ झालेले श्याम चेतन रस्त्यावर कोसळले. रस्त्यावरून जाणाऱ्यांनी गोळीबारचा आवाज ऐकला, त्यानंतर जमिनीवर श्याम चेतन यांना पडलेलं पाहिलं. क्षणाचा विलंब न करता नागरिकांनी पोलिसांना या घटनेची माहिती दिली. माहिती मिळताच पोलीस कर्मचारी घटनास्थळी दाखल झाले. रक्तबंबाळ झालेल्या महाराज चेतन यांना त्यांनी तात्काळ केजीएमयू ट्रॉमा सेंटरमध्ये दाखल केले. त्याच्यावर उपचार सुरू आहेत. जुन्या वैमनस्यातून आणि पोस्टर लावण्यावरून झालेल्या वादातून हा गोळीबार झाल्याचे सांगण्यात आले आहे.

या घटनेप्रकरणी बाजारखाला पोलिसांनी एका तरुणाला ताब्यात घेतले अशून त्यांची चौकशी केली जातेय. पोलीस घटनास्थळावरील सीसीटीव्ही फुटेजचीही तपासणी करत आहेत. सुरेश चंद्र तिवारी आपल्या कुटुंबासह मेहंदीगंज परिसरात राहतात. त्यांचा मुलगा, श्याम चेतन तिवारी, त्यांच्या घरासमोर बांधकाम करत होते.

मिळालेल्या माहितीनुसार, शनिवारी रात्री श्याम चेतन गवंडीकडून विटा बसवून घेत होते. त्याचवेळी शेजारी राहणारा वैभव बाजपेयी आपल्या मित्रासोबत तिथे आला. त्यांच्यात वाद झाला. याचदरम्यान आरोपींनी श्याम चेतनवर गोळीबार केला. एक गोळी श्याम चेतनच्या कमरेत लागली. त्यामुळे ते रक्तबंबाळ झाले आणि जमिनीवर कोसळले. गोळीबाराचा आवाज ऐकून कुटुंबीय आणि शेजारी घटनास्थळी धावले.