उत्तर प्रदेशातील फर्रूखाबाद जिल्ह्यात भयंकर घटना घडली. शहरातील एका कोचिंग सेंटरमध्ये शनिवारी भीषण स्फोट झाला. स्फोटाचं कारण समजू शकलेलं नाही. या दुर्घटनेत दोन विद्यार्थ्यांचा जागीच मृत्यू झाला. तर सहा विद्यार्थी गंभीर जखमी झाले आहेत.

स्फोटाची तीव्रता अधिक होती. स्फोटाच्या आवाजानं परिसर हादरला. घटनास्थळी पोलीस पोहोचले. त्यांनी तपास सुरू केला आहे. घटनेची माहिती मिळाल्यानंतर पोलीस अधीक्षक आणि जिल्हाधिकारी घटनास्थळी पोहोचले. त्यांनी पोलीस पथकाकडून घटनेची माहिती घेतली.

कादरीगेट पोलीस ठाण्याच्या हद्दीतील सातनपूर मंडी रोडवर एक कोचिंग सेंटर आहे. या सेंटरमध्ये शनिवारी संध्याकाळी अचानक मोठा स्फोट झाला. सगळीकडे धुराचे लोट पसरले होते. स्फोटाच्या आवाजानं आजूबाजूचा परिसर हादरला. नागरिक भयभीत झाले होते. तिथल्या नागरिकांनी घटनास्थळी धाव घेतली. कोचिंग सेंटरमध्ये काही विद्यार्थी जखमी अवस्थेत पडले होते. या घटनेची माहिती कादरीगेट पोलीस ठाण्यात देण्यात आली.

काही स्थानिकांनी घटनेची माहिती पोलिसांना दिली. ते घटनास्थळी पोहोचले. आठ विद्यार्थ्यांना जखमी अवस्थेत रुग्णालयात पाठवण्यात आले. त्यातील दोन विद्यार्थ्यांना डॉक्टरांनी मृत घोषित केले. सहा जणांनी प्रकृती गंभीर असल्याने त्यांच्यावर उपचार सुरू केले आहेत. काही विद्यार्थ्यांची प्रकृती अधिक गंभीर असल्याने त्यांना सैफई मेडिकल कॉलेजला पुढील उपचारासाठी पाठवण्यात आले. जवळपास दोन किलोमीटरपर्यंत स्फोटाचा आवाज आल्याचे काही स्थानिकांनी सांगितले.

पोलिसांनी केलेल्या प्राथमिक तपासात सेफ्टिक टँकमध्ये अधिक प्रमाणात गॅस असल्यानं हा स्फोट झाल्याचं कारण समोर आले आहे. घटनास्थळी पोहोचलेल्या फॉरेन्सिक पथकाने तपासणी केली असता, मीथेन गॅसमुळे हा स्फोट झाला. पोलिसांनी एका व्यक्तीला ताब्यात घेतले आहे. कोचिंग सेंटरमधील सर्व रेकॉर्ड तपासण्यात येत आहेत.