Train Ticket Conformation Tips : नोकरी, शिक्षणासाठी अनेकजण मुंबई, पुणे अशा महानगरांमध्ये राहत असतात. दिवाळीसारख्या सणांसाठी हे लोक घरी जाण्यासाठी तयारी करतात. या लोकांपुढील सर्वात मोठं आव्हान म्हणजे रेल्वे तिकिटे. गर्दी असल्याने कन्फर्म तिकीट मिळवणे कठीण होते. पण जर वेटिंग लिस्टमध्ये तिकीट असेल, तर काळजी करण्याची गरज नाही. रेल्वेकडे अनेक पर्याय आहेत, ज्यांच्यामुळे त्रासाशिवाय तुम्ही ट्रेनने प्रवास करु शकाल.

१. जर तुमचे तिकीट वेटिंग लिस्टमध्ये असेल, तर तुम्ही ट्रेनने प्रवास करू शकता येत नाही, असे गृहीत धरू नका. सणासुदीच्या काळात, अनेकदा लोक शेवटच्या क्षणी तिकिटे रद्द करतात. अशा परिस्थितीमध्ये वेटिंग तिकिट कन्फर्म होऊ शकते. म्हणून पीएनआर स्थिती वारंवार तपासत राहा.

२. जर तुमच्याकडे रिझर्व्हेशन अगेन्स्ट कॅन्सलेशन म्हणजे आरएसी तिकीट असेल, तर तुम्हीही ट्रेनने प्रवास करु शकता. पण तुम्हाला दुसऱ्या प्रवाशासह बर्थ शेअर करावी लागेल. जर एखाद्या प्रवाशाचे तिकीट रद्द झाले तर तुमचे आरएसी तिकीट पूर्ण सीटमध्ये रूपांतरित केले जाऊ शकते.

३. रेल्वे प्रशासनाने आपत्कालीन प्रवाशांसाठी तात्काळ तिकिटे नियुक्त केली आहेत. ही तिकिटे थोडी महाग असतात, पण त्यांची पृष्टी होण्याची शक्यता जास्त आहे. आयआरसीटीसीवर तात्काळ तिकिटे बुक करण्यासाठी तुमचे खाते आधारशी लिंक केलेले असणे आवश्यक आहे.

४. जर वेळ कमी असेल आणि मर्यादित जागा असतील, तर प्रीमियम तात्काळ तिकीट बुक करणे हा एक चांगला पर्याय आहे. शुल्क थोडे जास्त आहे. पण तिकिट मिळण्याची शक्यता जास्त आहे. ही तिकिटे ऑनलाइन आणि रेल्वे काउंटरवरुन अशा दोन्ही पद्धतीने खरेदी करता येतात.

५. ट्रेन सुटण्याच्या आठ तास आधी रेल्वे प्रशासनाकडून ट्रेन चार्ट तयार केला जातो. चार्ट तयार झाल्यानंतर जर काही जागा रिकाम्या राहिल्या, तर त्या प्रवाशांना चालू बुकिंगद्वारे वाटल्या जातात म्हणून शेवटच्या क्षणापर्यंत चार्ट तपासणे महत्त्वाचे आहे.

६. जर तुम्हाला वर दिलेल्या पर्यांयांपैकी एकानेही तिकीट मिळत नसेल, तर तुम्ही सामान्य तिकीट काढून प्रवास करू शकता. तिकीटामुळे रिझरवेशन मिळत नाही, याशिवाय लांब पल्ल्यासाठी प्रवास कमी आरामदायक असतो. पण जर घाई असेल, गरज असेल, तर हाच सर्वात उपयुक्त पर्याय आहे.