दिल्लीच्या उत्तरनगरमध्ये धक्कादायक घटना घडली आहे. महिलेने दिराच्या साथीने नवऱ्याची हत्या केल्याची घटना घडली आहे. या हत्याकांडाने दिल्ली हादरलं आहे. या प्रकरणी उत्तम नगर पोलिसांनी दोघांना अटक केली आहे.

करण देव असे हत्या करण्यात आलेल्या पतीचे नाव आहे. तर सुष्मिता देव असे पत्नीचे नाव आहे. दोघे ६ वर्षांच्या मुलासोबत विहार फेस-१ मध्ये राहत होते. सुष्मिताने त्यादिवशी सासू-सासऱ्यांना करणला विजेचा झटका लागून बेशुद्ध झाल्याचे सांगितलं. त्यानंतर करणला तातडीने मग्गो रुग्णालयात दाखल केले. रुग्णालयात दाखल केल्यानंतर डॉक्टरांनी करणला मृत घोषित केले.

करणच्या मृत्यूची बातमी नातेवाईकांनी पोलिसांना दिली. त्यानंतर दिल्लीच्या उत्तम नगर पोलिसांनी करणचा मृतदेह पोस्टपार्टमसाठी दीनदयाळ रुग्णालयात दाखल केला. सुष्मिता आणि चुलत दिर राहुल देव सातत्याने पोस्टमार्टम करण्यास टाळाटाळ करत होते. त्यामुळे करणच्या आई-वडिलांना संशय आला. त्यानंतर राहुलने कोणत्यातरी कामानिमित्त मोबाईल करणचा लहान भाऊ कुणालला दिला होता.

कुणालने यावेळी मोबाईलमधील सुष्मिता आणि राहुलचं चॅटिंग वाचलं. त्यावेळी संपूर्ण प्रकार समोर आला. या चॅटमध्ये त्या रात्री रचलेल्या कटाचे पुरावे सापडले. यानंतर कुटुंबीयांनी पोलिसांना तातडीने माहिती दिली. त्यानंतर पोलिसांनी दोघांना अटक केली.

सुष्मिता आणि राहुलमध्ये अनैतिक संबंध असल्याचा कुटुंबीयांनी आरोप केला. दोघांना मिळून करणच्या संपत्ती हडप करायची होती, असा आरोप देखील कुटुंबीयांनी केला. पोलिसांना दोघांना अटक केल्यानंतर चौकशी सुरु केली. दोघांच्या मोबाईलमधील चॅटमध्ये करणला इलेक्ट्रिक शॉक देऊन हत्या करण्याचे पुरावे आढळले. या प्रकरणी पुढील तपास सुरु आहे.