दिल्लीतील वसंत विहार येथील एका उद्योगपतीच्या सुनेच्या कथित आत्महत्येप्रकरणामुळे परिसरात खळबळ उडाली आहे. या प्रकरणात पोलिसांनी तक्रारीनुसार एफआयआर दाखल केला आहे. 'सामाजिक कार्यक्रमांपासून दूर ठेवणे. तसेच मानसिक आणि शारीरिक छळ', असा थेट आरोप मृत महिलेच्या नातेवाईकांनी केला आहे. मिळालेल्या माहितीनुसार, मृत महिलेच्या आईने या प्रकरणात सीबीआयची चौकशीची मागणी केली आहे.

एफआयआरनुसार, महिलेला गेल्या काही वर्षांत तिच्या वैवाहिक आयुष्यात हिसांचार आणि अपमान सहन करावा लागला होता. यामुळे तिनं टोकाचं पाऊल उचललं. मृत महिलेच्या आईनं दाखल केलेल्या तक्रारीत म्हटलं की, 'फेब्रुवारी - मार्च २०११ साली, पती आणि सासूने तिला घराच्या पहिल्या मजल्यावरून ओढून नेले. तसेच गर्भवती असताना तिच्यावर अत्याचार केला', असा आरोप मृत महिलेच्या आईनं केला.

पीडित महिलेनं तिच्या आईला याबाबत माहिती दिल्यानंतर, कुटुंब दिल्लीला रवाना झाले. दरम्यान, सासरच्या मंडळींनी तेव्हा माफी मागितली. तसेच पुन्हा असे वर्तन होणार नाही, असे सांगितले. मुलाच्या जन्मानंतर पीडित महिलेला पतीच्या अनैतिक संबंधाबाबत माहिती मिळाली. तेव्हा पीडित महिला आपल्या बाळासोबत माहेरी निघून गेली. वर्षभरानंतर सासरच्यांनी महिलेला सासरी नेली.

मृत महिलेच्या आईने आरोप केला की, मुलीला वारंवार वाईट वागणूक देण्यात आली. तिला फोन वापरण्यासही बंदी घालण्यात आली. याच त्रासाला कंटाळून महिलेनं आयुष्य संपवलं, असा आरोप मृत महिलेच्या घरच्यांनी केला. दुपारी १२ च्या सुमारास, कुटुंबाला फोन आला. महिलेला रूग्णालयात नेण्यात आले आहे. तिचा मृत्यू झाला आहे, असं सांगण्यात आले. या घटनेचा अधिक तपास सुरू आहे.