दिल्लीतील स्फोटाबाबत मोठी अपडेट समोर आली आहे. दिल्लीतील स्फोट हा दहशतवादी हल्ला असल्याची माहिती पोलिसांच्या सूत्रांकडून मिळाली आहे. या घटनेनंतर दोघांना ताब्यात घेण्यात आलं आहे. भीषण स्फोटानंतर देशभरात हाय अलर्ट जारी करण्यात आला आहे. घटनेनंतर दिल्ली पोलिसांनी काही भागात छापे देखील टाकले आहेत.

दिल्ली पोलिसांनी लाल किल्ल्याजवळील सीसीटीव्ही कॅमेराचे फुटेज तपासले. या कॅमेरात संशयित हालचाली करताना दिसणाऱ्या दोघांना पोलिसांनी ताब्यात घेतलं आहे. लाल किल्ल्याजवळ सीसीटीव्ही कॅमेरा हा उच्च रिझोल्यूशनचा आहे. या घटनेनंतर पोलिसांनी ताब्यात घेतलेल्या संशयिताची कसून चौकशी करण्यात येत आहे.

दिल्लीतील या स्फोटात १३ जणांचा मृत्यू झाल्याची माहिती मिळत आहे. तर ३० हून अधिक जण जखमी झाले आहेत. या स्फोटातील मृतांचा आकडा वाढण्याची शक्यता व्यक्त केली जात आहे. दिल्लीसहित देशभरातील शहरातील पोलीस यंत्रणा अलर्ट झाली आहे.

दिल्ली पोलीस आयुक्त सतीश गोलचा यांच्या माहितीनुसार, आज संध्याकाळी ६ वाजून ५२ मिनिटांनी एक वाहन सिग्नलवर थांबलं. त्याचवेळी त्या वाहनाचा स्फोट झाला. स्फोट इतका शक्तीशाली होता की आजूबाजूच्या वाहनांचंही नुकसान झालं. सर्व यंत्रणा, एफएसएल, एनआयए घटनास्थळी पोहोचल्या आहेत. या स्फोटात काही जणांचा मृत्यू झाला आहे. तर काही जण जखमी झाले आहेत. संपूर्ण परिस्थितीवर करडी नजर ठेवण्यात येत आहे. केंद्रीय गृहमंत्री अमित शहा यांचाही फोन आला होता. वेळोवेळी त्यांना घटना आणि आताच्या परिस्थितीची संपूर्ण माहिती दिली जात आहे.

तत्पूर्वी, या घटनेनंतर केंद्रीय गृहमंत्री अमित शहा यांनी तात्काळ दिल्ली पोलीस आयुक्तांशी चर्चा केली. एनएसजी, एनआयए आणि फॉरेन्सिक पथके घटनास्थळी पोहोचली आहेत. दिल्लीच्या स्फोटाच्या घटनेनंतर गृहमंत्री हे गुप्तचर यंत्रणेच्या प्रमुखांच्या सातत्यानं संपर्कात आहेत, अशी माहिती सूत्रांनी दिली. तर पंतप्रधान नरेंद्र मोदी यांनी दिल्लीच्या स्फोटाच्या घटनेनंतर तात्काळ परिस्थितीचा आढावा घेतला. त्यांच्याकडून या घटनेची संपूर्ण माहिती घेतली जात आहे. केंद्रीय गृहमंत्री अमित शहा यांच्याशी चर्चा करून त्यांच्याकडून परिस्थितीचा आढावा घेतला, अशी माहिती सूत्रांकडून देण्यात आली.