Delhi Mayor Election : दिल्लीत MCD निवडणुकीनंतर आज म्हणजेच 6 जानेवारी 2023 रोजी महापौरपदासाठी निवडणूक होत आहे. यासोबतच उपमहापौर आणि स्थायी समिती सदस्यांचीही निवड होणार आहे. मतदानापूर्वी नगरसेवकांना शपथ घ्यावी लागते. मात्र त्यापूर्वीच आपच्या नगरसेवकांनी सभागृहात गोंधळ घातला. यावेळी दोन्ही बाजूंनी जोरदार घोषणाबाजी करण्यात आली. महापौरांव्यतिरिक्त उपमहापौर आणि स्थायी समितीच्या 6 सदस्यांचीही आज निवडणूक होणार आहे.

नामनिर्देशित सदस्यांना पहिल्या शपथविधीला नगरसेवक विरोध करत आहात. आम आदमी पक्षाने महापौरपदाच्या निवडणुकीसाठी भाजपचे नगरसेवक सत्य शर्मा यांची पीठासीन अधिकारी म्हणून एलजीने नियुक्ती करण्यास आक्षेप घेतला. दुसरीकडे, काँग्रेसने या निवडणुकीत मतदानात सहभागी न होण्याचा निर्णय घेतला आहे.

महापौर कोण होणार ?

दिल्ली महानगरपालिकेच्या महापौर कोण होणार याचा फैसला आज होणार आहे. दिल्ली महानगरपालिकेत आम आदमी पक्षाने भाजपचा पराभव करत विजय मिळवला होता. आपने शैली ओबराय यांना महापौर पदाची उमेदवारी दिली आहे, तर उपमहापौर पदाची उमेदवारी मोहम्मद इकबाल यांना दिली आहे.

आज सर्वप्रथम सर्व नगरसेवकांना पद आणि गोपनियतेची शपथ दिली जाईल. त्यानंतर महापौर पदासह उपमहापौर आणि ६ स्थायी समितीच्या ६ सदस्याची निवड केली जाणार आहे. ही सर्व प्रक्रिया पूर्ण करण्यासाठी दिल्लीच्या राज्यपालांनी सत्य शर्मा यांची पीठासीन अधिकारी म्हणून निवड केली आहे. दिल्ली महानगरपालिका निवडणूकीत आपने १५ वर्षापासून सत्तेत असलेल्या भाजपचा पराभव केला होता.

भाजपने निवडणूकीत रंग भरला…

भाजपने महापौर आणि उपमहापौर पदाचा उमेदवार दिल्याने निवडणूक चांगलीच रंगात आली आहे. भाजप ऐन वेळी काही करू शकते. या भीतीने आप बहुमत असूनही जपून पावलं टाकत आहे. स्थायी समितीच्या निवडणुकीत भाजपचे २ सदस्य सहज निवडून येतील मात्र, भाजपने तिसरा उमेदवार दिल्याने भाजप काही चमत्कार घडून आणेल का असा सवाल या निमित्ताने उपस्थित केला जात आहे.