Delhi Malviya Nagar restaurant fire latest updates : देशाची राजधानी दिल्लीतून आगीची एक अत्यंत भयानक आणि दुर्दैवी दुर्घटना समोर आली आहे. दिल्लीतील गजबजलेल्या आणि प्रसिद्ध मालवीय नगर (Malviya Nagar) भागातील एका रेस्टॉरंटला आज भीषण आग लागली. मिळालेल्या माहितीनुसार, या दुर्घटनेत १० जणांचा होरपळून मृत्यू झाला आहे. तर २५ पेक्षा जास्त जण गंभीर जखमी आहेत. या आगीमुळे रेस्टॉरंटमधून धुराचे प्रचंड लोट बाहेर पडत असून, परिसरात नागरिकांमध्ये भीतीचे वातावरण निर्माण झाले आहे.

घटनेची माहिती मिळताच अग्निशामक दलाच्या गाड्या तातडीने घटनास्थळी दाखल झाल्या असून आग विझवण्याचे शर्थीचे प्रयत्न सुरू आहेत. यामुळे खबरदारीचा उपाय म्हणून शेजारील दुकाने आणि इमारती तातडीने रिकाम्या करण्यात आल्या आहेत. आग नेमकी कोणत्या कारणामुळे लागली, याचं कारण अद्याप समोर आलेले नाही. पण ही आग शॉर्टसर्किटमुळे लागल्याचे बोलले जात आहे.

रेस्टॉरंटमध्ये अचानक उसळल्या आगीच्या ज्वाला

मिळालेल्या प्राथमिक माहितीनुसार, मालवीय नगर येथील एका इमारतीमध्ये असलेल्या रेस्टॉरंटमध्ये आज अचानक आग लागली. रेस्टॉरंटमध्ये लाकडी फर्निचर आणि ज्वलनशील साहित्य असल्यामुळे आगीने काही वेळातच अत्यंत रौद्ररूप धारण केले. आगीच्या ज्वाला इतक्या तीव्र होत्या की आजूबाजूच्या परिसरात धुराचे काळे साम्राज्य पसरले. दिल्ली पोलिसांच्या माहितीनुसार, या घटनेत आतापर्यंत १० जणांचा मृत्यू झाला आहे. २५ जण भाजल्याचे वृत्त आहे. जखमींना उपचारासाठी रुग्णालयात दाखल करण्यात आले आहे.

कधी लागली आग?

आज सकाळी ९.४५ वाजताच्या दरम्यान दिल्ली अग्निशमन सेवेला (डीएफएस) या आगीबाबतचा कॉल आला. त्यानंतर अग्निशमन आणि बचाव पथकांना तातडीने घटनास्थळी पाठवण्यात आले. स्थानिक अधिकाऱ्यांनी सांगितले की, ही आग सकाळी अंदाजे ८.५० वाजता लागली. दिल्ली अग्निशमन दलाकडून दिलेल्या माहितीनुसार, जवानांनी रेस्टॉरंटच्या तळघरातून तीन जणांना बाहेर काढले आणि त्यांना तात्काळ रूग्णालयात दाखल केले. नेहरू प्लेस अग्निशमन केंद्राचे विभागीय अधिकारी (डीओ) रवींद्र हे घटनास्थळी उपस्थित असून बचाव कार्यावर देखरेख करत आहेत.

जखमींवर उपचार सुरू.., पोलिसांनी काय सांगितले?

दिल्ली पोलिसांनी दिलेल्या माहितीनुसार, इमारतीमधून ११ जखमींना बाहेर काढून वैद्यकीय उपचारासाठी रुग्णालयात दाखल करण्यात आले आहे.पोलीस अधिकाऱ्यांनी सांगितले की, जखमींवर उपचार सुरू आहेत. परिसरातील इतर इमारतीही खाली कऱण्यात आल्या आहेत. एका वरिष्ठ अग्निशमन अधिकाऱ्याने सांगितले की, रेस्टॉरंटमधील आग विझवण्यासाठी १० अग्निशमन गाड्या तैनात करण्यात आल्या आहेत. नंतर आगीवर नियंत्रण मिळवण्यात आले, तरीही इमारतीत कोणी अडकले आहे का हे तपासण्यासाठी अधिकाऱ्यांकडून शोध आणि बचाव कार्य सुरूच होते.