दिल्ली येथील जहांगीरपुरीतील एका डान्स क्लासमध्ये शिक्षकाने बारावीच्या विद्यार्थिनीवर बलात्कार केल्याची घटना उघडकीस आली आहे. १४ सप्टेंबरला तक्रार मिळाल्यानंतर पोलिसांनी बलात्कार व पॉक्सो कायद्यांतर्गत गुन्हा दाखल केला आणि आरोपी शिक्षक अमनला अटक केली. सध्या पीडितेचे समुपदेशन सुरु आहे, तसेच पोलिस प्रकरणाची सखोल चौकशी करत आहेत.

वृत्तानुसार, १७ वर्षांची पीडित मुलगी भालस्व डेअरी परिसरात आपल्या कुटुंबासह राहते आणि मॉडेल टाऊनमधील एका खाजगी शाळेत १२वीची शिक्षण घेते. तिला डान्सची आवड असून, अभ्यासासाठी तिने जहांगीरपुरी ब्लॉकमधील नृत्य अकादमी शोधण्यासाठी गुगलचा वापर केला.

नेमकं प्रकरण काय?

पीडितेच्या सांगण्यानुसार, तिच्या कुटुंबाने तिला एका डान्स क्लासमध्ये दाखल केले. नृत्य शिक्षक अमन याने फेब्रुवारी महिन्यात प्रशिक्षणाच्या बहाण्याने तिला क्लासमध्ये बोलावून तिच्यावर पहिल्यांदा बलात्कार केला. त्या वेळी क्लासमध्ये कोणीही नसल्याचा फायदा घेत आरोपीने पीडितेला धमकी दिली की, या घटनेबद्दल कुणाला सांगितल्यास तिचे करिअर उद्ध्वस्त केले जाईल. त्यानंतरही आरोपीने आणखी तीन वेळा तिच्यावर बलात्कार केल्याचा आरोप करण्यात आला आहे.

गेल्या महिन्यात आरोपीने पुन्हा पीडितेवर अत्याचार करण्याचा प्रयत्न केला. मात्र या वेळी पीडिता बचावून पळून जाण्यात यशस्वी झाली आणि घरच्यांना सत्य परिस्थिती सांगितली. संपूर्ण घडलेल्या प्रकारामुळे मानसिक धक्का बसलेल्या या मुलीचे सध्या समुपदेशन सुरू आहे.

प्रकरणाचा उलगडा होताच, पीडितेच्या वडिलांनी जहांगीरपुरी पोलीस ठाण्यात तक्रार दाखल केली. पोलिसांनी पॉक्सो कायद्यांतर्गत गुन्हा दाखल करत आरोपी डान्स शिक्षक अमनला अटक केली आहे. पोलिसांनी डान्स क्लासमधील इतर विद्यार्थ्यांची देखील चौकशी सुरू केली असून, त्यांचे समुपदेशनही केले जात आहे. सध्या या प्रकरणाची सखोल तपासणी सुरू आहे.