नवी दिल्ली – देशाची राजधानी दिल्लीतील (Delhi) चांदणी चौकात लजपत राय या मार्केटमध्ये आज भीषण आग लागल्याची माहिती समोर येत आहे. मात्र, आगीचे नेमके कारण काय आहे याबाबत अद्याप माहिती मिळू शकली नसून ही आग शॉर्टसर्किटमुळे लागल्याची शक्यता वर्तवली जात आहे. आगीची माहिती मिळताच अग्निशमन दलाच्या एकूण 12 गाड्या घटनास्थळी दाखल झाल्या आहेत तसेच आग विझवण्याचे शर्तीचे पर्यंत सुरु आहेत. (lajpat nagar market latest news)

दिल्ली अग्निशमन दलाचे सहाय्यक विभागीय अधिकारी राजेश शुक्ला यांनी या आगीबाबत माहिती दिली आणि सांगितलं की, “ आगीमुळे एकूण 105 दुकाने पेटले आहेत, या भागाला तेह बाजारी असे म्हणतात. नागरिकांचे म्हणणे आहे कि, शॉर्टसर्किटमुळे आग लागली आहे. या आगीमध्ये कोणतीही जीवितहानी किंवा दुखापत झालेली नाही. तर, आग विझवण्यात आली असून सध्या कूलिंगचे काम सुरु आहे.

घटनासथळी मिळालेल्या माहितीनुसार, अग्निशमन दलासह स्थानिक लोकही मोठ्या संख्येने उपस्थित असून त्यांनीही मदतकार्यात हातभार लावला. अग्निशमन विभागाने सांगितले की, आम्हाला आगीची माहिती सकाळी पहाटे 5.45च्या सुमारास मिळाली होती. या अपघातामुळे कोट्यवधी रुपयांचे नुकसान झाले असल्याची शक्यता आहे.

दिल्लीतील चांदणी चौक ही बाजारपेठ देशभर प्रसिद्ध आहे. कपड्यांची दुकाने तसेच इलेक्‍ट्रॉनिक वस्तूंची दुकाने मोठ्या प्रमाणात आहेत. या बाजारात दररोज लाखो लोक खरेदीसाठी येत असतात.