Congress nationwide protest against Gyanesh Kumar : निवडणूक प्रक्रियेत गडबड आणि 'वोट चोरी' होत असल्याचा आरोप करत काँग्रेसने केंद्र सरकार आणि मुख्य निवडणूक आयुक्तांविरोधात जोरदार मोर्चा उघडला आहे. काँग्रेस अध्यक्ष मल्लिकार्जुन खरगे आणि खासदार राहुल गांधी यांच्या उपस्थितीत झालेल्या वरिष्ठ नेत्यांच्या बैठकीत 'वोट बचाओ, देश बचाओ' या नावाने एक महिनाभर देशव्यापी आंदोलन चालवण्याचा निर्णय घेण्यात आला आहे.

मुख्य निवडणूक आयुक्तांच्या राजीनाम्याची मागणी

काँग्रेसचे सरचिटणीस के. सी. वेणूगोपाल आणि जयराम रमेश यांनी पत्रकार परिषदेत सांगितले की, मुख्य निवडणूक आयुक्त (CEC) ज्ञानेश कुमार यांनी आपले पद सोडेपर्यंत आणि निवडणूक पद्धतीत सुधारणा होईपर्यंत हे आंदोलन थांबणार नाही. काँग्रेसने निवडणूक आयोगावर गंभीर आरोप करत त्याला 'चीटिंग कमिशन ऑफ इंडिया' असे म्हटले आहे.

आंदोलनाची रूपरेषा कशी असणार?

'इंडिया' (INDIA) आघाडीचे सर्व खासदार संसद भवनापासून थेट निवडणूक आयोग कार्यालयापर्यंत शांततापूर्ण मोर्चा काढणार आहेत. १० ते २० ऑक्टोबर दरम्यान जिल्हा स्तरावर निदर्शने केली जातील. त्यानंतर २५ ऑक्टोबर ते २५ नोव्हेंबर या काळात सर्व राज्यांमध्ये आणि जिल्ह्यांमध्ये 'वोट बचाओ, देश बचाओ, CEC हटाओ' रॅली आणि गावात चौपाल आयोजित केल्या जातील.त्याशिवाय ज्या मतदारांची नावे मतदार यादीतून परस्पर वगळण्यात किंवा हटवण्यात आली आहेत, अशा लोकांपर्यंत पोहोचून त्यांची नावे पुन्हा यादीत समाविष्ट करण्यासाठी काँग्रेस कार्यकर्ते मदत करतील.

३ प्रमुख मागण्यांवर काँग्रेस ठाम:

• मुख्य निवडणूक आयुक्त ज्ञानेश कुमार यांनी तात्काळ राजीनामा द्यावा.

• मतदार याद्यांची सध्या सुरू असलेली पुनरीक्षण प्रक्रिया रद्द करावी.

• आगामी निवडणुका ईव्हीएमऐवजी बॅलेट पेपरवर (मतपत्रिकेवर) घेण्यात याव्यात.

काँग्रेसने या आंदोलनात सहभागी होण्यासाठी आम आदमी पार्टी (AAP), डीएमके (DMK) आणि बीजेडी (BJD) यांसारख्या इतर विरोधी पक्षांनाही सोबत येण्याचे आवाहन केले आहे.