पंजाबच्या मोगाच्या धर्मकोट हलके या भागातील भिंडर कला गावात शनिवारी सकाळी काँग्रेस नेत्याची हत्या झाल्याची घटना घडली आहे. उमरसीर सिंह असे हत्या झालेल्या नेत्याचे नाव आहे. या हत्येनंतर मृत उमरसीर यांच्या नातेवाईकांनी कारवाईसाठी आक्रमक भूमिका घेतली आहे. नातेवाईक पोलीस स्टेशनसमोरच आंदोलनाला बसले आहेत.

मिळालेल्या माहितीनुसार, उमरसीर सिंह हे शनिवारी सकाळी कारने कामाला निघाले. घरापासून ५०० मीटर दूर पोहोचल्यानंतर अज्ञात हल्लेखोरांनी त्यांना गाठलं. त्यानंतर या हल्लेखोरांनी काँग्रेस नेत्यावर १० ते १५ राऊंड गोळीबार केला. या गोळीबारात काँग्रेस नेते उमरसीर सिंह यांचा जागीच मृत्यू झाला.

वहिनीने ब्लॉक समितीची निवडणूक जिंकली होती

उमरसीर सिंह हे नेस्ले इंडिया लिमिटेड कंपनीत कार्यरत होते. तसेच कामगार यूनियनचे नेते होते. त्याचबरोबर काँग्रेससाठी देखील काम करत होते. ते गावात पंचायतचे सदस्य देखील होते. २०२५ साली झालेली ब्लॉक समितीची निवडणूक त्यांची वहिनी वीरपाल कौर यांनी लढवली होती. या निवडणुकीत त्यांचा विजय झाला होता.

उमरसीर सिंह यांच्या मृत्यूने त्यांचा १३ वर्षीय मुलगा आणि ६ वर्षीय मुलीने मोठा आधार गमावला आहे. राजकीय वादातून त्यांची हत्या झाल्याचा कुटुंबीयांचा आरोप आहे. कुटुंबीयांचं आरोप आहे की, 'गावातील सरपंच इंदरपाल सिंह यांनी राजकीय वादातून उमरसीर सिंह यांची हत्या केली आहे. उमरसीर सिंह यांच्या भावाने थेट सरपंचावर हत्येचा षडयंत्र रचल्याचा आरोप केलाय.

उमरसीर सिंह यांच्या कुटुबीयांना पोलिसांनी कारवाईचे आश्वासन दिलं आहे. या प्रकरणी पोलिसांत सरपंच इंदरपाल सिंह यांच्यासहित ७ लोकांच्या विरोधात हत्येचा गुन्हा नोंदवण्यात आला आहे. पोलिसांनी या प्रकरणी कारवाईलाही सुरुवात केली आहे.