गुजरातमध्ये मॉर्निंग वॉकला गेलेल्या काँग्रेस नेत्याची निर्घृण हत्या करण्यात आल्याची धक्कादायक घटना समोर आली आहे. गुजरातच्या आणंद शहरात ही घटना घडली. काँग्रेसचे माजी नगरसेवक इक्बाल हुसेन मलिक यांची चाकूने हल्ला करत हत्या करण्यात आली. मंगळवारी सकाळी ७ वाजताच्या सुमारास बाकरोल परिसरातील गोया तलावाजवळ मलिक नेहमीप्रमाणे मॉर्निंग वॉकला गेले होते. त्याचवेळी हल्लेखोरांनी त्यांच्यावर चाकूने सपासप वार करून हत्या केली. या घटनेमुळे गुजरातमध्ये खळबळ उडाली.

पोलिसांनी दिलेल्या माहितीनुसार, मलिक मॉर्निंग वॉकसाठी घराबाहेर पडले. गोया तलावाजवळ पोहचल्यानंतर काही हल्लेखोर तिथे आले. त्यांनी धारधार शस्त्रांनी मलिक यांच्यावर हल्ला केला. चाकूने त्यांच्या मानेवर आणि पोटावर सपासप वार केले गेले. या हल्ल्यात गंभीर जखमी झालेल्या मलिक यांचा जागीच मृत्यू झाला. हल्लेखोरांनी इतक्या क्रूरपणे हल्ला केला की मलिक यांना स्वत:ला वाचवण्याची एकही संधी मिळाली नाही. हल्ल्यानंतर हल्लेखोरांनी घटनास्थळावरून पळ काढला.

मलिक यांच्या हत्येनंतर त्यांच्या भावाने पोलिस ठाण्यात धाव घेत तक्रार दाखल केली. मलिक यांच्यावरील हल्ला हा सुनियोजित कटाचा भाग होता. त्यांची हत्या करण्यामागचे कारण अद्याप समोर आले नाही. मलिक यांच्या हत्येप्रकरणी पोलिसांनी गुन्हा दाखल करत तपास सुरू केला आहे. आरोपी सध्या फरार असून पोलिस त्यांचा शोध घेत आहेत.

दरम्यान, आणंद नगरपालिकेला महानगरपालिकेचा दर्जा देण्यात आला आहे. यासह जुन्या नगरपालिकेची निवडून आलेली शाखा बरखास्त करण्यात आली. मलिक हे या संस्थेचे माजी काँग्रेस नगरसेवक होते आणि स्थानिक राजकारणात सक्रिय मानले जात होते. मलिक यांच्या हत्येमुळे एकच खळबळ उडाली आहे. या घटनेचा गुजरात पोलिस सध्या तपास करत आहेत.