काँग्रेसने दिल्ली विधानसभा निवडणुकीच्या पार्श्वभूमीवर एका नव्या गॅरंटीबद्दल आश्वासन दिलंय. त्यांनी तिसऱ्या गॅरंटीबद्दल जाहीर केलं असून, युवा उड्डाण असं योजनेचं नाव आहे. या योजनेंतर्गत बेरोजगार युवक युवतींना एका वर्षाच्या शिकाऊ उमेदवारासाठी दरमहा ८,५०० रूपये मिळतील. काँग्रेससाठी या गॅरंटीची घोषणा राजस्थानचे माजी उपमुख्यमंत्री आणि दिग्गज नेते सचिन पायलट यांनी जाहीर केलं आहे.

योजनेची घोषणा करताना पायलट म्हणाले, आज स्वामी विवेकानंद यांची जयंती आहे. या निमित्ताने युवक आणि युवतींसाठी एका गॅरंटीची घोषणा करणार आहोत. भाजप आणि आप हे दोन्ही पक्ष युवकांबद्दल विचारपूस करीत नाहीत. आजच्या घडीला संपूर्ण देशातील तरूणवर्ग बेरोजगारीमुळे त्रस्त आहेत. राजकारणात गेल्या काही वर्षात केवळ आरोप प्रत्यारोप सुरू आहे. यामध्ये दिल्ली आणि केंद्र सरकारचा समावेश आहे.

त्यामुळे काँग्रेसचा विधानसभा विधानसभा निवडणुकीत विजय झाला तर, तरूणांवर आम्ही लक्ष केंद्रित करू. आम्ही सत्तेत आलो तर, दिल्लीतील सुशिक्षित बेरोजगार तरूणांना दरमहा ८,५०० रूपये देऊ. तसेच युवकांना त्यांच्या क्षेत्राशी संबंधित कामे देखील दिले जातील, जेणेकरून इन्कम सुरू होईल, असं आश्वासन पायलट यांनी दिले आहे.

याआधी काँग्रेसने दिल्ली विधानसभा निवडणुकीसाठी २ आश्वासने दिले आहेत. पहिली प्यारी दीदी योजना आणि दुसरी जीवन रक्षा योजना. प्यारी दीदी योजनेच्या अंतर्गत प्रत्येक महिलेला दरमहा २,५०० रूपये देण्याचे आश्वासन दिले आहे. तर जीवन रक्षा योजनेंतर्गत दिल्लीतील प्रत्येक रहिवाशांना २५ लाख रूपयांचा आरोग्य विमा दिला जाईल, असं आश्वासन काँग्रेस पक्षाकडून देण्यात आले आहे.