Business News : चालू आर्थिक वर्षात अमेरिका हा भारताचा सर्वात मोठा व्यापारी भागीदार (India-US Trade) म्हणून उदयास आला आहे. याआधी भारताचा सर्वाधिक मोठा व्यापारी भागीदार हा चीन होता. मात्र आता अमेरिकेने चीनला मागे टाकलं आहे.

वाणिज्य मंत्रालयाच्या आकडेवारीनुसार, भारत आणि अमेरिका यांच्यातील द्विपक्षीय व्यापार 2022-23 मध्ये 7.65 टक्क्यांनी वाढून 128.55 अब्ज डॉलर्स इतका झाला आहे. आर्थिक वर्ष 2021-22 हे 119.5 अब्ज डॉलर्स इतका होता. तर 2020-21 मध्ये भारत-अमेरिका व्यापार 80.51 अब्ज डॉलर्स इतका होता. (Latest Marathi News)

मिळालेल्याआकडेवारीनुसार, 2021-22 मधील 76.18 अब्ज डॉलर्सच्या तुलनेत 2022-23 मध्ये भारतातून अमेरिकेला होणारी निर्यात 2.81 टक्क्यांनी वाढून 78.31 अब्ज डॉलर्स इतकी झाली आहे. तर आयात सुमारे 16 टक्क्यांनी वाढून 50.24 अब्ज डॉलर्स इतकी झाली आहे.

भारत आणि चीनमधील व्यापार झाला कमी

चालू आर्थिक वर्षात भारताचा चीनसोबतचा द्विपक्षीय व्यापार 2021-22 मधील 115.42 अब्ज डॉलरच्या तुलनेत 1.5 टक्क्यांनी कमी होऊन 113.83 अब्ज डॉलरवर आला आहे. 2022-23 मध्ये भारतातून चीनला होणारी निर्यात जवळपास 28 टक्क्यांनी घसरून 15.32 अब्ज इतकी झाली आहे. तर गेल्या आर्थिक वर्षात आयात 4.16 टक्क्यांनी वाढून 98.51 अब्ज डॉलर्स इतकी झाली आहे. व्यापार तूट 2021-22 मध्ये 72.91 अब्ज डॉलर्सच्या तुलनेत गेल्या आर्थिक वर्षात 83.2 अब्ज डॉलर्स झाली.

तज्ज्ञांच्या मते, भारताचा अमेरिकेसोबतचा द्विपक्षीय व्यापार वाढवण्याची प्रक्रिया आगामी काळातही सुरूच राहणार आहे. कारण दोन्ही देशांची सरकारे आर्थिक संबंध मजबूत करण्यावर भर देत आहेत. फेडरेशन ऑफ इंडियन एक्सपोर्ट ऑर्गनायझेशन्सचे (FIEO) अध्यक्ष ए शक्तिवेल म्हणाले की, फार्मास्युटिकल्स, अभियांत्रिकी, रत्ने आणि दागिने यासारख्या वस्तूंच्या वाढत्या निर्यातीमुळे भारताला अमेरिकेत आपली शिपमेंट पुढे घेऊन जाण्यास मदत होत आहे.