राजस्थानच्या अजमेर जिल्ह्यातील प्रसिद्ध तीर्थक्षेत्र असलेल्या पुष्कर घाटात एक भीषण अपघात झाला आहे. पिसांगूनहून पुष्करकडे जाणारी एक खासगी बस अनियंत्रित होऊन १५० फूट खोल दरीत कोसळली. या भीषण अपघातात एका निष्पाप बालकाचा जागीच मृत्यू झाला, तर अनेक प्रवासी गंभीर जखमी झाले आहेत.

मिळालेल्या माहितीनुसार, खासगी बसमध्ये ३१ प्रवासी होते. पुष्कर घाट धोकादायक घाट आहे. येथील एका वळणावर बस पोहोचताच चालकाचे स्टेअरिंगचा ताबा सुटला. त्यामुळे बस खोल दरीत कोसळली.बस कोसळल्यानंतर प्रवाशांच्या किंकाळ्यांनी अख्खा घाट परिसर दुमदुमला.

स्थानिक लोक आणि पोलिसांकडून मदत कार्य सुरू

प्रवाशांच्या किंकाळ्यांनी परिसरात दुमदुमला होता. या आवाजामुळे स्थानिक लोक आणि इतर वाहन धारकांनी घटनास्थळाकडे धाव घेतली. अपघाताची माहिती मिळताच पुष्कर शहरातील पोलिसांचे एक पथक घटनास्थळी दाखल झाले. दरी खूप खोल असल्याने पोलिसांसाठी बचावकार्य आव्हानात्मक ठरले. मोठ्या प्रयत्नांनंतर पोलीस आणि गावकऱ्यांनी जखमींना बसमधून बाहेर काढले.

त्यांना रुग्णवाहिकेद्वारे पुष्कर सामुदायिक आरोग्य केंद्रात दाखल केले. अनेक जखमी प्रवाशांची प्रकृती गंभीर आहे. प्रथमोपचार दिल्यानंतर पाचपेक्षा जास्त गंभीर जखमी प्रवाशांना अजमेर येथील जवाहरलाल नेहरू (जेएलएन) रुग्णालयात दाखल करण्यात आले आहे. डॉक्टरांच्या मते अनेक प्रवाशी गंभीररिस्त्या जखमी झाले आहेत.

अपघात कशामुळे झाला?

पोलिसांनी बस ताब्यात घेतली असून तपास सुरू केला आहे. सुरुवातीला या अपघाताबाबत दोन मुख्य शक्यता वर्तवल्या जात आहेत. एकतर दरीतून खाली उतरताना बसचे ब्रेक निकामी झाले असतील. किंवा चालकाच्या निष्काळजीपणा अपघात झाला असावा. अपघाताचे नेमके कारण शोधण्यासाठी पोलीस प्रवाशांचे जबाब नोंदवत आहेत.