Summary:

• हैदराबाद मोइनाबाद फार्महाऊसवर ड्रग्ज पार्टीवर पोलिसांचा छापा

• ड्रग्ज पार्टी प्रकरणात खासदारासह ११ जणांना पोलिसांनी अटक केली

• रोहित रेड्डी यांच्या फार्महाऊसवर पोलिसांची कारवाई

• ड्रग्ज सेवन प्रकरणामुळे तेलंगणात राजकीय खळबळ

आंध्र प्रदेशातल्या राजकारणातून मोठी बातमी समोर आली आहे. आंध्र प्रदेशमध्ये खासदाराला पोलिसांनी अटक केली. तेलुगु देसम पार्टीचे खासदार पुट्टा महेश कुमार आणि भारत राष्ट्र समितीचे माजी आमदार पायलट रोहित रेड्डी यांच्यासह ११ जणांना पोलिसांनी अटक केली. हैदराबादच्या मोइनाबादमधील एका फार्म हाऊसवर ड्रग्जचे सेवन करताना या सर्वांना पोलिसांनी पकडलं. या घटनेनंतर खासदार आणि अन्य सात जणांना चौकशी करून सोडण्यात आले. या घटनेमुळे आंध्रप्रदेशमध्ये खळबळ उडाली आहे.

अधिकाऱ्यांनी सांगितले की, खासदार महेश कुमार, माजी आमदार रोहित रेड्डी आणि आणखी चार जणांची ड्रग्जचे सेवन केल्याप्रकरणी तपासणी करण्यात आली. तपासणी अहवालामध्ये यामधील अनेकांनी ड्रग्ज घेतल्याचे स्पष्ट झाले. मोईनाबाद येथील रोहित रेड्डी यांच्या मालकीच्या फार्महाऊसवर ड्रग्जचे सेवन केले जात असल्याची माहिती तेलंगणा पोलिसांना मिळाली होती. या विश्वसनीय माहितीच्या आधारे पोलिसांनी रोहित रेड्डी यांच्या फार्म हाऊसवर छापा टाकला. याठिकाणी खासदार आणि माजी आमदारासह अनेक जण ड्रग्ज घेत असल्याचे आढळून आले.

पोलिसांनी अटक केलेल्यांमधील एका व्यावसायिकाने पार्टीदरम्यान रिव्हॉल्व्हरमधून हवेत तीन गोळ्या झाडल्याचा आरोप आहे. त्याने पोलिसांच्या टीमवर एक गोळी झाडली. गोळीबार करणारी व्यक्ती दारूच्या नशेत होत असे सांगितले जात आहे. घटनास्थळावरून पोलिसांनी एक रिव्हॉल्व्हर, एक काडतूस जप्त केले. या प्रकरणी रोहित रेड्डी आणि एका व्यावसायिकासह ३ जणांना पोलिसांनी अटक केली. त्यांना कोर्टात हजर करण्यात आले असता कोर्टाने न्यायालयीन कोठडी सुनावली.

खासदार महेश कुमार आणि इतर सात जणांना पोलिस ठाण्यात जामीन मंजूर करण्यात आला आणि नोटीस बजावल्यानंतर रविवारी संध्याकाळी त्यांची सुटका करण्यात आली. महेश कुमार ड्रग्जच्या नशेत असल्याचे वृत्त आहे. फार्महाऊसवर उपस्थितीत असलेल्या ११ जणांच्या लघवीची तपासणी करण्यात आली. तर रोहित शेट्टीसह पाच जणांनी ड्रग्ज घेतले असल्याचे स्पष्ट झाले. तर खासदाराच्या तपासणी अहवालामध्ये ड्रग्ज घेतलं नसल्याची माहिती समोर आली.