बिहारच्या राजकारणातून एक मोठी बातमी समोर आली आहे. बिहार विधान परिषद निवडणुकीत जनता दल युनायटेडचे (जेडीयू) उमेदवार नीरज कुमार यांच्या विरोधात प्रचार करणे आणि पक्षाच्या वरिष्ठ नेतृत्वाविरोधात चुकीचे वक्तव्य करणे आमदार अनंत सिंह यांना चांगलेच महागात पडले आहे. जेडीयूने अनंत सिंह आणि त्यांच्या पत्नी नीलम देवी यांची पक्षातून ६ वर्षांसाठी हकालपट्टी केली आहे. तसेच अनंत सिंह यांची विधानसभा सदस्यता रद्द करण्याची शिफारसही विधानसभा अध्यक्षांकडे करण्यात आली आहे.

जेडीयूचे प्रदेशाध्यक्ष उमेश कुशवाहा यांनी शनिवारी यासंदर्भातील अधिकृत आदेश जारी केला. पक्षाच्या आदेशांचे उल्लंघन करणे, वरिष्ठ नेतृत्वाबाबत चुकीचे आणि अपमानास्पद भाषा वापरणे तसेच विधान परिषद निवडणुकीत पक्षाच्या अधिकृत उमेदवाराविरोधात काम करणे, या कारणांवरून अनंत सिंह यांच्यावर कारवाई करण्यात आल्याचे आदेशात नमूद करण्यात आले आहे.

पक्षाच्या आरोपानुसार, अनंत सिंह यांनी जेडीयूचे उमेदवार नीरज कुमार यांच्याविरोधात प्रचार केला होता. तसेच दुसऱ्या पक्षाच्या उमेदवाराला पाठिंबा दिला होता. या प्रकरणाची दखल घेत पक्षाने त्यांच्यावर कारवाई करत, त्यांची सहा वर्षांसाठी पक्षातून हकालपट्टी केली आहे. याशिवाय, अनंत सिंह यांची विधानसभा सदस्यता तातडीने रद्द करण्याची शिफारस विधानसभा अध्यक्षांकडे करण्यात आली आहे. त्यामुळे आता त्यांच्या आमदारकीबाबत पुढे काय निर्णय घेतला जातो, याकडे राजकीय वर्तुळाचे लक्ष लागले आहे.

अनंत सिंह यांच्या पत्नी नीलम देवी यांच्याविरोधातही जेडीयूने कठोर भूमिका घेतली आहे. त्यांचे सदस्यत्व रद्द करून त्यांनाही सहा वर्षांसाठी पक्षातून हाकलवण्यात आले आहे. विधान परिषद निवडणुकीदरम्यान अनंत सिंह आणि जेडीयूचे उमेदवार नीरज कुमार यांच्यातील मतभेद उघड झाले होते. अनंत सिंह यांनी पटना पदवीधर मतदारसंघातून जन सुराजचे उमेदवार अनुज कुमार यांना पाठिंबा दिला होता. त्यानंतर त्यांच्या विरोधात पक्षाकडून कारवाई होण्याची शक्यता व्यक्त केली जात होती. अखेर जेडीयूने दोघांवरही कारवाईचा बडगा उगारला आहे. या निर्णयामुळे बिहारच्या राजकारणात नव्या चर्चांना सुरुवात झाली असून, अनंत सिंह यांच्या विधानसभा सदस्यतेबाबत विधानसभा अध्यक्ष काय निर्णय घेतात, हे पाहणे महत्त्वाचे ठरणार आहे.