संसदेचे पावसाळी अधिवेशन 20 जुलैपासून सुरु होणार आहे. त्यापूर्वी केंद्रीय मंत्रिमंडळाचा विस्तार होणार असल्याची चर्चा आहे. मंत्रिमंडळ विस्तारात कोणत्या नेत्याला संधी मिळणार याची उत्सुकता लागली आहे. त्यातच आता भाजपमध्ये मोठे फेरबदल होणार असल्याची चर्चा सुरू झाली आहे. भाजपच्या संसदीय मंडळात लवकरच फेरबदल करण्यात येणार आहे.

दोन दिवसापूर्वीच केंद्रीय गृहमंत्री अमित शाह, भाजपचे राष्ट्रीय अध्यक्ष नितीन नबीन यांची बैठक पार पडली. यामध्ये येत्या काळात होत असलेल्या विस्ताराबाबत विस्तृतपणे चर्चा झाली. आता भाजपच्या संसदीय मंडळात लवकरच फेरबदल करण्यात येतील असं सांगितलं जातंय. त्यामध्ये महाराष्ट्रातील दोन बड्या नेत्यांना लॉटरी लागण्याची शक्यता वर्तवली जातेय.

केंद्रातील नव्या टीमची आखणी करण्यासाठी 2 जुलैला केंद्रीय गृहमंत्री अमित शहा, राष्ट्रीय अध्यक्ष नितीन नबीन आणि राष्ट्रीय सरचिटणीस बी एल संतोष या तिघांमध्ये तीन सविस्तर चर्चा झाली. मंत्रिमंडळ विस्तार आणि फेरबदलाची तयारी अंतिम टप्प्यात आहे.

याबाबत लवकरच यासंदर्भातील घोषणा होण्याची शक्यता आहे. केंद्रीय मंत्रिमंडळ फेररचनेत काही केंद्रीय मंत्र्यांना पक्ष संघटनेत पुन्हा महत्त्वाच्या जबाबदाऱ्या दिल्या जाऊ शकतात. तर पक्षातील काही दिग्गज पदाधिकाऱ्यांना केंद्र सरकारमध्ये मंत्रीपदाची संधी मिळण्याची शक्यता व्यक्त केली जातेय.

नितीन नबीन यांना राष्ट्रीय अध्यक्ष बनवण्यात आल्यानंतर त्यांच्या नेतृत्वाखालील टीममध्ये तरुण आणि नव्या चेहऱ्यांना घेतलं जाणार आहे. त्याचबरोबर अनुभवी वरिष्ठ नेते आणि नव्या पिढीतील नेत्यांचा समतोल साधण्याचाही प्रयत्न केला जाणार आहे. भाजपचे राष्ट्रीय उपाध्यक्ष, राष्ट्रीय सरचिटणीस, राष्ट्रीय सचिव तसेच केंद्रीय मीडिया टीममधील नियुक्त्यांबाबतीत उच्चस्तरीय चर्चा सुरु आहे. पक्षाच्या नव्या टीम तयार करताना प्रादेशिक, राज्यनिहाय आणि जातीय प्रतिनिधित्वाला महत्व दिले जाणार असल्याचं म्हटलं जातंय.