भारतीय जनता पक्षाचे नेते आणि प्रसिद्ध यूट्यूबर मनीष कश्यप यांच्यावर हल्ला झाल्याची धक्कादायक घटना समोर आली आहे. ही घटना पाटणा मेडिकल कॉलेज अॅण्ड हॉस्पिटल येथे घडली असून, महिला डॉक्टरांशी झालेल्या वादानंतर रूग्णालयातील ज्युनियर डॉक्टरांनी मनीष कश्यपला मारहाण केली आहे. या घटनेनंतर मनीष कश्यप आणि डॉक्टरांचे समर्थक पोलीस ठाण्यात पोहोचले. सध्या दोन्ही बाजूंकडून एकमेकांवर गंभीर आरोप होत असून, पोलीस संपूर्ण प्रकरणाची चौकशी करत आहेत.

नेमकं काय घडलं?

पीएमसीएचमधील डॉक्टरांच्या माहितीनुसार, मनीष कश्यप एका रूग्णाच्या वतीने तक्रार मांडण्यासाठी रूग्णालयात आले होते. यावेळी त्यांचा महिला डॉक्टरांशी वाद झाला. डॉक्टरांच्या म्हणण्यानुसार, मनीष यांनी महिला डॉक्टरांसोबत असभ्य वर्तन केले. ज्यामुळे संतप्त झालेल्या ज्युनियर डॉक्टरांनी त्यांच्यावर हल्ला केला असल्याची माहिती समोर आली आहे.

दुसरीकडे मनीष कश्यप यांच्या समर्थकांनी हा दावा फेटाळून लावला आहे. कोणत्याही महिला डॉक्टरशी गैरवर्तन झाले नसल्याचे त्यांनी स्पष्ट केले. त्यांच्या म्हणण्यानुसार, मनीष यांच्यावर कारण नसताना हल्ला करण्यात आला आहे. या झटापटीत त्यांच्या चेहऱ्यावर गंभीर दुखापत झाली आहे. कश्यप यांच्या समर्थकांनी आणखी गंभीर आरोप करत सांगितले की, हल्ल्यानंतर कश्यप यांना बंदिस्त ठेवले होते. मोठ्या मध्यस्थीनंतरच त्यांची सुटका झाली, असेही ते म्हणाले.

या घटनेनंतर मनीष कश्यप आणि डॉक्टरांचे काही समर्थक पोलीस ठाण्यात पोहोचले. सध्या दोन्ही बाजूंकडून एकमेकांवर गंभीर आरोप होत असून, पोलीस संपूर्ण प्रकरणाची चौकशी करत आहेत.