आरोग्य यंत्रणेच्या निष्काळजीपणामुळे एका भाजप नेत्याला आपला गुरुवारी (दि.5) जीव गमवावा लागला आहे. या घटनेच्या निषेधार्थ कार्यकर्त्यांनी रस्त्यावर उतरून जोरदार निषेध व्यक्त केला आहे. या नेत्याचा मृत्यू वैद्यकीय निष्काळजीपणामुळे झाल्याचे सांगितले जात आहे. झारखंडमधील सिमडेगा जिल्ह्यातील एका कार्यक्रमामध्ये भाजपचे महामंत्री रामेश्वर सिंह यांची अचानक तब्येत बिघडली. यावेळी त्यांना जवळच्या रुग्णालयात नेण्यात आले. मात्र रुग्णालयात डॉक्टर आणि स्टाफ उपलब्ध नसल्याने महामंत्र्यांवर उपचार झाले नाही आणि त्यांनी आपला प्राण सोडला. यानंतर कार्यकर्त्यांचा संताप अनावर झाला आणि जोरदार निषेध व्यक्त करत जलडेगा शहरात बंद पुकारला.

दोषींवर कारवाईची मागणी

भाजप कार्यकर्त्यांनी आरोग्य व्यवस्थेत सुधारणा आणि दोषींवर कारवाईची मागणी करत जोरदार घोषणाबाजी केली. शहरातील सर्व दुकाने बंद केली असून जागोजागी निदर्शने केली. दोन दिवसांपूर्वी भाजपचे नेते रामेश्वर सिंह यांचे एका कार्यक्रमादरम्यान अचानक तब्येत बिघडली, आणि ते मंचावरून खाली पडले. यानंतर त्यांना जवळच्या रुग्णालयात नेले असता त्या ठिकाणी एक ही डॉक्टर आणि एकही वैद्यकीय कर्मचारी उपस्थित नसल्याने त्यांना उपचार मिळू शकला नाही. त्यामुळेच त्यांचा मृत्यू झाल्याचा आरोप कार्यकर्त्यांनी केला.

मिळालेल्या माहितीनुसार, कार्यकर्त्यांचा आरोप आहे की रामेश्वर सिंह यांची प्रकृती बिघडल्यानंतर आणि त्यांना रुग्णालयात आणल्यानंतर, डॉक्टरांनी त्यांच्याकडे दुर्लक्ष केले. त्यांचा असाही आरोप आहे की त्यांच्यावर अजिबात उपचार केले गेले नाहीत, ज्यामुळे त्यांचा मृत्यू झाला. काही कार्यकर्ते या प्रकरणाची चौकशी करण्याची मागणी करत आहेत. परिस्थिती बिघडल्यानंतर रुग्णालय प्रशासनाने तातडीने कारवाई केली नाही, ज्यामुळे ही घटना घडली, असे त्यांचे म्हणणे आहे. या घटनेमुळे झारखंडचे राजकारण तापले आहे.