उत्तर प्रदेशच्या बुलंदशहरमधून एक धक्कादायक बातमी समोर येत आहे. भाजपचे माजी ब्लॉक प्रमुख यांची निर्घृण हत्या करण्यात आली आहे. पोलिसांना या घटनेची माहिती मिळताच त्यांनी घटनास्थळी धाव घेतली. त्यावेळी नेत्याचा मृतदेह रक्ताच्या थारोळ्यात पडलेला आढळला. जुन्या वैमनस्यातून किंवा राजकारणातून त्यांची हत्या झाल्याचा आरोप कुटुंबियांनी केला आहे. सध्या पुढील तपास सुरू आहे.

विनोद चौधरी असे मृत भाजपचे माजी ब्लॉक प्रमुखाचे नाव आहे. ते खुर्जा कोतवाली नगर परिसरातील हमीदपूर कला येथील रहिवासी होते. विनोद चौधरी हे जेवर आणि खुर्जाचे माजी ब्लॉक प्रमुख होते. सोमवारी सकाळी त्यांचा मृतदेह त्यांच्या घरात मृतदेह आढळला. मृतदेह सापडल्यानंतर परिसरात खळबळ उडाली.

विनोद चौधरीचे भाऊ म्हणाले की, 'माझा भाऊ कामानिमित्त ४ ते ५ जणांसोबत गेला होता. सायंकाळी माझा भाऊ परतलाच नाही. त्याचं कुणासोबत तरी पैशांवरून वाद सुरू होता. त्या व्यक्तीनं विनोदला जीवे मारण्याची धमकीही दिली होती. यासंदर्भात तक्रार दाखल करण्यासाठी आम्ही पोलीस ठाण्यात गेलो होतो', अशी माहिती त्यांनी दिली.

विनोद चौधरी नक्की कोण होते?

विनोद चौधरी हे २००० ते २००५ पर्यंत जेवर परिसरातील ब्लॉक प्रमुख होते. नंतर ते जिल्हा पंचायत सदस्य होते. यानंतर ते पुन्हा खुर्जाचे ब्लॉक प्रमुख होते. विनोद चौधरी हे बराच काळ भारतीय जनता पक्षाशी संबंधित होते. त्यांची हत्या जु्न्या वैमनस्यातून किंवा राजकारणातून झाली असल्याचा आरोप कुटुबियांनी व्यक्त केला आहे.