तामिळनाडू विधानसभा निवडणुकीसाठी भारतीय जनता पक्षाने उमेदवारांची घोषणा केली आहे. भाजपने शुक्रवारी २७ जागांसाठी उमेदवारांच्या नावाची यादी जाहीर केली. यात माजी राज्यपाल यांच्यासहित अनेक मातब्बर नेत्यांच्या नावाचा समावेश आहे. परंतु यात भाजपचे माजी प्रदेशाध्यक्ष, राज ठाकरेंना आव्हान देणारे अण्णामलाई यांच्या नावाचा समावेश नाही. त्यामुळे अण्णामलाई यांचे तिकीट कापल्याची चर्चा राजकीय वर्तुळात सुरू झाली आहे.

भाजपने जाहीर केलेल्या यादीत अण्णामलाई यांच्या नावाचा समावेश नाही. मागील विधानसभा निवडणुकीत तामिळनाडूत पक्षातील संघटनेची मोर्चेबांधणी करणारे अण्णामलाई यांना दूर ठेवण्याचा निर्णय घेण्यात आला होता. भाजप नेत्यांचं म्हणणं आहे की, अण्णामलाई यांना रणनीती, प्रचाराची जबाबदारी देण्यात येऊ शकते. भाजपने एआयएडीएमके पक्षामुळे अण्णामलाई यांना निवडणुकीपासून दूर ठेवण्यात आल्याची चर्चा आहे.

भाजपने जाहीर केलेल्या यादीत केंद्रीय मंत्री एल मुरूगन यांच्यापासून माजी राज्यपाल सुंदरराजन यांच्या नावाचा समावेश आहे. भाजपने एल मुरुगन यांना अनुसूचित जातीसाठी राखीव असलेल्या मतदारसंघात उमेदवारी दिली आहे. तर तेलंगणाचे माजी राज्यपाल तिमिलिसाई सुंदरराजन यांना मायलापूर विधानसभा मतदारसंघात उमेदवारी दिली आहे. कोयंबटूर (उत्तर) जागेवर वी श्रीनिवासन यांना उमेदवारी देण्यात आली आहे.

भाजपने सत्तूर येथून नैनार नागेंद्रन यांना उमेदवारी देण्यात आली आहे. तर तिरुपूर (दक्षिण) येथून एस थंगराज यांना तिकीट मिळालं आहे. तत्पूर्वी, तामिळनाडूत विधानसभेच्या एकूण २३४ जागा आहेत. या सर्व जागांसाठी २३ एप्रिल रोजी मतदान होणार आहे. तामिळनाडूत भाजपने एआयएडीएमके पक्षाशी युती केली आहे.