Bilaspur airport : छत्तीसगडच्या बिलासपूर विमानतळावर मोठा अनर्थ टळला. बिलासपूर एअरपोर्टवर विमान उतरत असताना अचानक त्याचा टायर फुटला. या दुर्घटनेतून प्रवासी आणि क्रू मेंबर बालंबाल बचावले.

मिळालेल्या माहितीनुसार, दिल्ली-बिलासपूर अलायन्स एअरचे एक विमान छत्तीसगडच्या बिलासपूर विमानतळावर उतरत होते. त्याचवेळी अचानक विमानाचा टायर फुटला. या विमानात ३७ प्रवासी आणि ४ क्रू मेंबर्स होते. टायर फुटताच विमानातील प्रवाशांमध्ये एकच घबराट पसरली.

बिलासपूर विमानतळ प्राधिकरणाच्या माहितीनुसार, सर्व प्रवाशांना धावपट्टीवरून सुरक्षित बाहेर आणण्यात आले आहे. त्यानंतर सर्व प्रवाशांना टर्मिनल बिल्डिंगमध्ये नेण्यात आले.

विमानतळावरील एका अधिकाऱ्याने दिलेल्या माहितीनुसार, ही घटना शुक्रवारी सकाळी ११ वाजताच्या सुमारास घडली. हे विमान एअरपोर्टवर उतरत असताना त्याचा टायर फुटला. अलायन्स एअरच्या या विमानात एकूण ४१ जण होते. त्यात ३७ प्रवासी आणि चार क्रू मेंबर होते. लँडिंगच्या वेळी विमानाच्या डाव्या बाजूचा टायर फुटला.

विमानातील सर्व प्रवासी आणि क्रू मेंबरना सुरक्षित बाहेर काढण्यात आले आणि धावपट्टीवरून टर्मिनल बिल्डिंगमध्ये आणले गेले, अशी माहिती विमानतळावरील अधिकाऱ्यांनी दिली. संबंधित विमान कंपनीने विमानाचे पुढील उड्डाण रद्द केले, अशी माहितीही अधिकाऱ्यांनी दिली.

यापूर्वीही अशीच एक घटना बिहारच्या दरभंगा येथे घडली होती. दरभंगा विमानतळावर मुंबईहून उड्डाण भरलेल्या विमानाचा टायर अचानक फुटला होता. लँडिंगवेळीच ही दुर्घटना घडली होती. त्यावेळी विमानात १४८ प्रवासी होते. सर्व प्रवासी सुखरूप होते.