बिहारमधील रोहतास जिल्ह्यातील आगरेर येथे एक धक्कादायक घटना घडली आहे. सुनेनं जेवणात विष घालून सासरे आणि पतीची हत्या केल्याचा आरोप आहे. विषारी जेवणामुळे घरातील मेहुणाही गंभीर आजारी पडला आहे. त्याच्यावर सासाराम येथील सदर रुग्णालयात उपचार सुरू आहेत. पोलिसांनी आरोपी सून धनौतु देवीला अटक केली असून, तिच्या आईलाही ताब्यात घेऊन चौकशी केली जात आहे.

घटना कुठे घडली?

ही घटना बक्सर जिल्ह्यातील धनसोई पोलीस स्टेशन परिसरातील रामपूर गावातील रहिवासी बेचन चौधरी यांच्या कुटुंबाशी संबंधित आहे. बेचन चौधरी (४८) हे आपल्या दोन मुलांसह आगरेर येथे गवंडी काम करत राहत होते. त्याच्या मुलांची नावे विशाल कुमार (१९) आणि विकास कुमार (१४) असे आहे. कामावरून मिळणाऱ्या पैशांनी ते कुटुंबाचा पोट भरत असे.

नेमकं प्रकरण काय?

बुधवारी रात्रीच्या जेवणानंतर सर्वांना अचानक उलट्या आणि प्रकृती बिघडल्याची लक्षणे दिसली. यामध्ये बेचन चौधरी आणि त्यांचा मोठा मुलगा विशाल कुमार यांचा मृत्यू झाला. धाकटा मुलगा मात्र सध्या गंभीर अवस्थेत उपचार घेत आहे.

पैशांवरून वाद

या घटनेची माहिती मिळताच पोलीस अधीक्षक रोशन कुमार यांच्या मार्गदर्शनाखाली पोलिसांनी घटनास्थळी धाव घेतली. एफएसएल(FSL) पथकाने जागेवरून पुरावे गोळा केले. चौकशीत असे समोर आले की घरातील सून धनौतु देवी आणि तिच्या पतीमध्ये पैशांवरून वाद होत होता. वारंवार पैशासाठी दबाव टाकल्याने सूडाच्या भावनेतून तिने अन्नात विष मिसळून सासरे, पती आणि मेहुण्याला खायला दिले.

सासाराम-२ चे एसडीपीओ कुमार वैभव यांनी माहिती देताना सांगितले की, प्रारंभीच्या चौकशीत विष देऊन हत्या केल्याचे स्पष्ट झाले आहे. पोलिसांनी या प्रकरणाची सखोल चौकशी सुरू केली आहे. दोषींना कोणत्याही परिस्थितीत सोडले जाणार नाही, असे अधिकाऱ्यांनी स्पष्ट केले. म्हणून आता या घटनेमुळे त्या परिसरात भीतीचे वातावरण निर्माण झाले आहे.