बंगळुरूमध्ये डॉक्टर कृतिका एम. रेड्डी यांच्या हत्येचा आरोप असलेल्या डॉक्टर महेंद्र रेड्डी जी.एस यांच्याप्रकरणात धक्कादायक खुलासे समोर आले आहेत. पत्नीच्या मृत्यूनंतर रेड्डी यांनी काही महिलांशी संपर्क साधला. तसेच त्यांना लग्नासाठी प्रस्ताव दिला. पोलिसांनी दिलेल्या माहितीनुसार, रेड्डी यांनी एका महिलेसमोर पत्नीची हत्या केल्याचं कबूल केलं. डॉ. कृतिका यांच्या फॉरेन्सिक रिपोर्टमध्ये शरीरात भूलीचं औषध असल्याचं आढळून आलं.

टाइम्स ऑफ इंडियाच्या वृत्तानुसार, रेड्डीनं किमान चार ते पाच महिलांना मेसेज पाठवले होते. त्यापैकी मेडिकल प्रोफेशन असलेल्या महिलेला रेड्डीनं मेसेज टाकला. पोलिसांनी सांगितले की, रेड्डीने तिला एक मेसेज केला. 'तुमच्यासाठी मी माझ्या पत्नीची हत्या केली', असं त्याने लिहिलं. यानंतर त्या महिलेनं रड्डीला ब्लॉक केलं. त्यानंतर रेड्डीनं त्या महिलेला फोन पेवर मेसेज पाठवला.

पोलिसांनी सांगितले की, रेड्डी यांनी २४ एप्रिल रोजी भूल देऊन कृतिकाची हत्या केली. नंतर १४ ऑक्टोबर रोजी उडुपी जिल्ह्यात त्याला अटक करण्यात आली. पोलिसांनी तपास करून मोबाईल फोन आणि लॅपटॉप जप्त केला आहे. तपासादरम्यान, त्यानं महिलांना पाठवलेले मेसेज उघड झाले.

पीटीआयच्या वृत्तानुसार, पोलिसांनी सांगितले की, बिझनेसमॅन मुनी रेड्डी यांनी त्यांचे जावई डॉ. महेंद्र रेड्डी जीएसच्या विरोधात तक्रार दाखल केली. त्यानंतर महेंद्र रेड्डीविरोधात गुन्हा दाखल करण्यात आला. तक्रारीत त्यांनी आपल्या मुलीची हत्या जावयाने केली असल्याचा आरोप केला. महेंद्रने लग्नानंतर कृतिकाला त्रास देण्यास सुरूवात केली. महेंद्रने कृतिकाच्या कुटुंबावर रूग्णालयाच्या बांधकामासाठी पैसे देण्यासाठी दबाव टाकला होता. नंतर महेंद्रनेच कृतिकाची चुकीचे औषध देऊन हत्या केली, असा आरोप कृतिकाच्या वडिलांनी केला.