गेले काही दिवस बंगालच्या उपसागरात थैमान घातलेल्या अर्णब चक्रीवादळाचा आता वेग मंदावला असून नवं चक्रीवादळ येणार असल्याची चाहूल लागली आहे. दरम्यान आता बंगालच्या उपसागरात तयार झालेल्या कमी दाबाच्या क्षेत्रामुळे देशातील अनेक राज्यांमध्ये हवामान बदलण्याची शक्यता आहे. हे कमी दाबाचे क्षेत्र आता अधिक सक्रिय होत असून, पुढील १२ ते १८ तासांत त्याचे चक्रीवादळात रूपांतर होण्याची शक्यता हवामान विभागाने वर्तवली आहे. त्यामुळे नागरिकांनी सतर्क राहण्याचे आवाहन करण्यात आले आहे.

हवामान विभागाच्या माहितीनुसार, बंगालच्या उपसागरातील ही हवामान प्रणाली पश्चिम-उत्तर-पश्चिम दिशेने पुढे सरकत आहे. २ नोव्हेंबरच्या संध्याकाळपर्यंत हे वादळ आंध्र प्रदेशच्या किनारपट्टीजवळ पश्चिम-मध्य बंगालच्या उपसागरात पोहोचण्याची शक्यता आहे. या बदलत्या हवामानाचा परिणाम देशातील अनेक भागांवर होऊ शकतो.

२० राज्यांमध्ये पावसाची शक्यता

हवामान विभागाने देशातील एकूण २० राज्यांसाठी पावसाचा इशारा दिला आहे. यामध्ये तमिळनाडू, केरळ, आंध्र प्रदेश, कर्नाटक, तेलंगणा, पश्चिम बंगाल, सिक्कीम, झारखंड, बिहार, ओडिशा, मध्य प्रदेश, महाराष्ट्र, छत्तीसगड, अरुणाचल प्रदेश, आसाम, मेघालय, नागालँड, मणिपूर, मिझोराम आणि त्रिपुरा या राज्यांचा समावेश आहे. या राज्यांमध्ये काही ठिकाणी हलका ते मध्यम पाऊस, तर काही भागांत मुसळधार पाऊस पडण्याची शक्यता आहे. विशेष म्हणजे, या काळात ताशी ४० ते १०० किलोमीटर वेगाने वारे वाहू शकतात.

महाराष्ट्रात वादळी पावसाचा अंदाज

राज्यातील काही भागांत पुढील काळात पावसाचे वातावरण निर्माण होण्याची शक्यता आहे. हवामान विभागाने पूर्व विदर्भातील यवतमाळ, नागपूर, भंडारा, गोंदिया, गडचिरोली आणि चंद्रपूर या जिल्ह्यांसाठी येलो अलर्ट जारी केला आहे. या भागांत विजांच्या कडकडाटासह वादळी पाऊस पडण्याचा अंदाज वर्तवण्यात आला आहे.याशिवाय सिंधुदुर्ग, नाशिक, अहिल्यानगर, पुणे, सातारा, सांगली, कोल्हापूर, धाराशिव आणि नांदेड जिल्ह्यांतही विजांसह पावसाची शक्यता आहे. त्यामुळे या भागातील नागरिकांनी हवामानाचा अंदाज लक्षात घेऊन काळजी घ्यावी. दरम्यान, राज्यातील इतर जिल्ह्यांमध्ये आकाश अंशतः ढगाळ राहण्याची शक्यता आहे. काही ठिकाणी तापमानात चढ-उतार पाहायला मिळू शकतात.