बंगळुरू - गेल्या अनेक दिवसांपासून कर्नाटकात हिजाब प्रकरणावरून (Hijab Controversy) कर्नाटकातील राजकीय वातावरण ढवळून निघालं आहे. त्यातच आता कर्नाटकातील शाळा-महाविद्यालयांमध्ये हिजाबवर बंदी घातल्याच्या वादात नवा मुद्दा निर्माण झाला आहे. शिमोगा जिल्ह्यात रविवारी रात्री बजरंग दलाच्या (Bajrang Dal) कार्यकर्त्याची हत्या झाल्यानंतर तणाव वाढला आहे. २६ वर्षीय हर्ष हा बजरंग दलाचा कार्यकर्ता होता, त्याची हत्या करण्यात आली आहे. वार झाल्यानंतर हर्षाला उपचारासाठी रुग्णालयात (Hospital) दाखल करण्यात आले. पण उपचारादरम्यान त्याचा मृत्यू झाला. हिजाबविरोधी पोस्ट केल्यामुळे हर्षाची हत्या झाल्याचा आरोप काही संघटनांकडून केला जात आहे. (Bajrang Dal activist stabbed to death in Karnataka)

हे देखील पहा -

पण ही हत्या नेमक्या कोणत्या कारणातून झाली? याची कोणीतीही अधिकृत माहिती अद्याप पोलिसांकडून देण्यात आली नाही. बजरंग दलाच्या कार्यकर्त्याची हत्या झाल्याने शिमोगा परिसरात तणावाचे वातावरण निर्माण झाले आहे. या घटनेनंतर जिल्ह्यात तणाव वाढला असून हिंदू संघटनांमध्ये संतापाचे वातावरण आहे. त्यामुळे प्रशासनाने कडक कारवाई करत सुरक्षा व्यवस्था वाढवली असून कोणत्याही प्रकारचा हिंसाचार होऊ नये यासाठी कलम 144 लागू करण्यात आले आहे. हिजाबच्या वादातूनही ही हत्या झाल्याचे बोलले जात आहे, मात्र अद्यापपर्यंत प्रशासनाकडून याला दुजोरा मिळालेला नाही.