शिवाजी काळे -

Himachal Pradesh Election: हिमाचल प्रदेशच्या विधानसभा निवडणुकीची घोषणा झाल्यानंतर काँग्रेसने (Congress) 46 उमेदवारांची पहिली यादी जाहीर केली आहे. मात्र, उमेदवारांची यादी जाहीर होताच कॉंग्रेसमध्ये मोठी बंडखोरी पाहायला मिळत आहे. देशातील सर्वात जुना पक्ष असलेल्या काँग्रेस पक्ष सध्या केंद्रीय सत्तेपासून दूर आहे.

पक्ष वाढीसाठी काँग्रेस नेते राहुल गांधी (Rahul Gandhi) भारत जोडो यात्रेच्या माध्यमातून देश पिंजून काढत आहेत. तर दुसरीकडे अनेक दिवसांपासून रखडलेल्या काँग्रेस पक्षाच्या अध्यक्षपदाच्या निवडणूकीचा (Congress President) निकाल देखील आज लागणार आहे. काँग्रेसकडून पक्ष मजबूत करण्याचे प्रयत्न सुरु असतानाच पुन्हा एकदा या पक्षाला गळती लागल्याचं पाहायला मिळालं आहे.

पाहा व्हिडीओ -

हिमाचल प्रदेशमधील विधानसभा निवडणुकीची (Himachal Pradesh Election) घोषणा झाल्यानंतर काँग्रेसने आपल्या 46 उमेदवारांची पहिली यादी जाहीर केली. मात्र, ही यादी जाहीर होताच काँग्रेसमध्ये मोठी बंडखोरी झाली आहे. कारण, कुल्लूच्या बंजार मतदारसंघातून तिकीट न मिळाल्याने आदित्य विक्रम सिंह (Vikram Singh) यांनी पक्षाचा राजीनामा दिला आहे.

तर किन्नौरचे विद्यमान आमदार जगत सिंह नेगी यांचे नाव पहिल्या यादीत नाही. चंबाच्या भरमौर जागेसाठी अद्यापपर्यंत घोषणा करण्यात आलेले नाही. राज्यात युवक काँग्रेस आणि काही माजी आमदारांच्या विरोधानंतर पक्ष आता तिकिट वाटपानंतरही पुनर्विचार करताना दिसत आहे.

12 नोव्हेंबरला मतदान -

निवडणूक आयोगाकडून हिमाचल प्रदेशमधील विधानसभेच्या 68 जागांसाठी निवडणूकांची घोषणा करण्यात आली आहे. हिमाचल प्रदेश विधानसभेची मुदत 8 जानेवारी 2023 ला संपत असून त्या अगोदर निवडणूका घेतल्या जाणार आहेत. हिमाचल मधील एकूण 68 जागांपैकी एससीसाठी 17 जागा आणि एसटीसाठी 3 जागा राखीव आहेत. तर हिमाचलमधील मतदान हे एकाच टप्प्यात घेतलं जाणार आहे. 12 नोव्हेंबरला मतदान होणार आहे तर 8 डिसेंबरला निवडणूकीचा निकाल जाहीर करण्यात येणार आहे.