• अमृतसरमध्ये ड्युटीवर असलेल्या पोलिस अधिकाऱ्यावर गोळ्या झाडल्या

• एएसआय हरजीत सिंग यांची अमृतसरमध्ये निर्घृण हत्या

• पंजाबमध्ये रात्री गस्त घालताना पोलिस अधिकाऱ्यावर गोळीबार

• अमृतसरच्या धान्य बाजाराजवळ घडली घटना

पंजाबच्या अमृतसरमध्ये हत्याकांडाची भयंकर घटना घडली. ड्युटीवर तैनात असलेल्या एएसआयची गोळ्या झाडून हत्या करण्यात आली. हरजीत सिंग असं हत्या झालेल्या एएसआयचे नाव होते. अमृतसरच्या हकीमा पोलिस ठाण्याच्या हद्दीत ही हत्याकांडाची घटना घडली. या घटनेमुळे पंजाब हादरले आहे. या हल्ल्याची जबाबदारी एका दहशतवादी संघटनेने घेतली आहे.

एएसआय हरजीत सिंग हे दुचाकीवरून गस्त घालत होते. त्याचवेळी अज्ञात हल्लेखोराने त्यांच्यावर अंदाधुंद गोळीबार केला. या गोळीबारामध्ये ते गंभीर जखमी झाले. जखमी अवस्थेत त्यांना अमृतसरमधील एका रुग्णालयात दाखल केले पण डॉक्टरांनी उपचारापूर्वी त्यांना मृत घोषीत केले. या प्रकरणाचा तपास पोलिस करत आहेत. एएसआय हरजीत सिंग हे हकीमा पोलिस ठाण्यात तैनात होते. या घटनेची जबाबदारी तहरीक-ए-तालिबान हिंदुस्तान या दहशतवादी संघटनेने स्वीकारली आहे. पण पोलिसांनी अद्याप या घटनेला दुजोरा दिला नाही.

पोलिसांनी दिलेल्या माहितीनुसार, गुरूवार आणि शुक्रवारी मध्यरात्री २.३० वाजताच्या सुमारास गेट हकिमा पोलिस ठाण्याच्या हद्दीत ही घटना घडली. ते ड्युटीवर तैनात होते. धान्य बाजाराजवळ ते दुचाकीवरून गस्त घालत होते. त्याचवेळी धान्य बाजाराच्या गेट क्रमांक २ बाहेर दुचाकीवरून आलेल्या दोन अज्ञात हल्लेखोरांनी त्यांच्यावर गोळीबार केला. हरजीत सिंग यांच्या मानेला गोळी लागली. गोळीबाराची माहिती मिळताच पोलिसांनी घटनास्थळी धाव घेतली. त्यांनी गंभीर अवस्थेत हरजीत सिंग यांना रुग्णालयात नेले. पण तोपर्यंत उशिर झाला होता. डॉक्टरांनी त्यांना मृत घोषीत केले.

पोलिस आता हल्लेखोरांची ओळख पटवून घटनेमागील सूत्रे एकत्र जोडण्याचे काम करत आहेत. घटनास्थळाच्या परिसरातील सीसीटीव्ही फुटेज आणि इतर तांत्रिक पुराव्यांचा वापर केला जात आहे. तपास पूर्ण झाल्यावर हल्ल्यामागील हेतू आणि आरोपींची ओळख स्पष्ट होईल. या हल्ल्यानंतर, 'तेहरीक-ए-तालिबान हिंदुस्तान' नावाच्या संघटनेने याची जबाबदारी स्वीकारली आहे. अमृतसरमध्ये यापूर्वीही पोलिसांना लक्ष्य करण्यात आले आहे. याआधी देखील एसआय जोग सिंग यांची गोळ्या झाडून हत्या करण्यात आली होती.