मुंबई: एअर इंडियाच्या ए ३२० (Air India) नियो विमानानं उड्डाण केल्यानंतर अवघ्या २७ मिनिटांनंतर मुंबई विमानतळावर इमर्जन्सी लँडिंग करावं लागलं. तांत्रिक बिघाडामुळं हवेतच असताना विमानाचं इंजिन बंद पडलं. त्यामुळं तातडीने मुंबई विमानतळावर विमान उतरावावं लागलं. शुक्रवारी ही माहिती सूत्रांकडून देण्यात आली. गुरुवारी अन्य विमानानं प्रवाशांना बेंगळुरूला रवाना करण्यात आलं, अशी माहिती एअर इंडियाच्या प्रवक्त्यांनी दिली.

सूत्रांच्या माहितीनुसार, नागरी उड्डाण महासंचालनालयाकडून या घटनेची चौकशी सुरू आहे. एअर इंडियाच्या ए ३२० नियो (Air India) या विमानांमध्ये सीएफएमचे लीप इंजिन असतात. ए ३२० नियो विमानाच्या पायलटला सकाळी ९.४३ मिनिटांनी मुंबईतील छत्रपती शिवाजी महाराज आंतरराष्ट्रीय विमानतळावरून उड्डाण भरल्यानंतर काही मिनिटांनंतर लगेच एका इंजिनात बिघाड झाल्याची माहिती मिळाली.

सूत्रांनी सांगितले की, इंजिन बंद पडल्यानंतर सकाळी १०.१० मिनिटांनी पुन्हा मुंबई विमानतळावर विमानाचं इमर्जन्सी लँडिंग करण्यात आलं. या घटनेबाबत एअर इंडियाच्या प्रवक्त्यांनी सांगितले की, 'एअर इंडिया सुरक्षिततेला सर्वोच्च प्राधान्य देत आहे. आमचे पायलट अशी परिस्थिती उद्भवली तर, तिला सामोरे जाण्यास तयार असतात. आमच्या अभियांत्रिकी आणि देखभाल-दुरुस्ती टीमने तातडीने तपासणी सुरू केली आहे.' प्रवाशांना अन्य विमानाने बेंगळुरूकडे रवाना करण्यात आले, अशी माहितीही त्यांनी दिली.