दिल्लीतील लाहोरी गेट परिसरात घडलेल्या एका गंभीर प्रकरणाने परिसर हादरला आहे. एका महिलेनं पोलिसांत तक्रार दाखल करत सांगितले की तिच्या पतीचा मित्र अनीस सिद्दीकीने आर्टिफिशियल इंटेलिजेन्स (AI) चा गैरवापर करून तिचे अश्लील फोटो आणि व्हिडिओ तयार केले. त्यांचा आधार घेत ब्लॅकमेल केले आणि वारंवार तिच्यावर बलात्कार केला. या घटनेत आरोपीसोबत त्याची आई आणि बहीणही सहभागी असल्याचा दावा पीडितेने केला आहे.

नेमकं प्रकरण काय?

३० वर्षीय पीडिता आपल्या कुटुंबासोबत लाहोरी गेट परिसरात राहते. तिचा पती सुकामेव्याचा व्यवसाय करतो. गेल्या वर्षी सप्टेंबर महिन्यातील वाढदिवसाच्या कार्यक्रमात अनीसने तिच्यासोबत काढलेला फोटो घेतला आणि त्याचा वापर करून आक्षेपार्ह एआय फोटो आणि व्हिडिओ तयार केले. यावर्षी जून महिन्यात, जेव्हा तिचा पती घरी नव्हता, तेव्हा अनीसने पीडितेला हे फोटो दाखवून धमकी दिली की ते व्हायरल करून तिचे वैवाहिक जीवन उद्ध्वस्त करेल. त्याने घटस्फोटाचा धाक दाखवला आणि तिला ब्लॅकमेल करत बलात्कार केला.

AI चा गैरवापर

महिलेच्या मते, आरोपीची आई व बहीणही या ब्लॅकमेल आणि जबरी कृत्यात सहभागी होत्या. सततच्या धमक्यांमुळे आणि भीतीपोटी तिने आरोपीला पाच लाख रुपये आणि १०० ग्रॅम सोन्याचे दागिने दिले. मात्र इतक्यावरही अनीस थांबला नाही. सप्टेंबर महिन्यात त्याने पुन्हा तिचे एआय बनवलेले व्हिडिओ आणि फोटो सोशल मीडियावर व्हायरल केले.

पीडितेच्या पतीला तिचे आक्षेपार्ह फोटो मिळाल्यानंतर त्याने चौकशी केली आणि संपूर्ण प्रकार उघडकीस आला. त्यानंतर तिच्या पतीच्या मदतीने तिने धैर्य गोळा करून पोलिसांत एफआयआर(FIR) दाखल केला. सध्या या प्रकरणाचा तपास एसआय अवंती राणी यांच्या नेतृत्वाखाली केला जात आहे.

पोलिसांनी आरोपीचा मोबाईल जप्त करून फॉरेन्सिक तपासणीसाठी पाठवला आहे. तथापि, अद्याप आरोपी व त्याच्या कुटुंबातील कोणालाही अटक करण्यात आलेली नाही. या प्रकरणामुळे एआय तंत्रज्ञानाच्या गैरवापराबाबत आणि त्यातून होणाऱ्या गुन्ह्यांबाबत गंभीर प्रश्न उपस्थित झाले आहेत. परिसरात भीतीचे वातावरण असून, महिलांच्या सुरक्षिततेबाबत चिंता व्यक्त केली जात आहे.