Accident Video : सोशल मीडियावर एक थरारक व्हिडीओ व्हायरल होत आहे. या व्हिडीओमध्ये एका काळ्या रंगाच्या चारचाकी कारने एका तरुणाला आणि एका महिलेला चिरडल्याचे पाहायला मिळते. अपघाताची घटना सीसीटीव्ही कॅमेऱ्यामध्ये कैद झाली. दोन्ही अपघातग्रस्तांची प्रकृती गंभीर असल्याचे म्हटले जात आहे. ही घटना बिहारच्या राजधानी पटनामध्ये घडल्याचे म्हटले जात आहे.

मिळालेल्या माहितीनुसार, सदर अपघाताची घटना २ ऑक्टोबर २०२५ रोजी घडली असल्याचे म्हटले जात आहे. एक काळ्या रंगाची एसयूव्ही पटनामधील बोरिंग रोडवरुन वेगाने जात होती. कारने समोर फोनवर बोलत चालत असलेल्या एका तरुणाला मागून धडक दिली. या कारने आणखी एका महिलेला चिरडल्याचेही म्हटले जात आहे. दोघेही रस्त्यावर जखमी होऊन पडले असताना कारचालक घटनास्थळाहून पळून गेला.

अपघात रस्त्याच्या कडेला असलेल्या सीसीटीव्ही कॅमेऱ्यामध्ये कैद झाली. या कॅमेऱ्यातील सीसीटीव्ही फुटेजचा वापर करुन पोलीस तपास करत आहेत. या फुटेजचा व्हिडीओ सोशल मीडियावर व्हायरल झाला आहे. व्हिडीओमध्ये कारने सुरुवातीला तरुणाला आणि नंतर महिलेला धडक देत चिरडल्याचे स्पष्टपणे पाहायला मिळते.

अपघातानंतर घटनास्थळी मोठा गोंधळ उडाला. स्थानिक नागरिकांनी जखमींना जवळच्या रुग्णालयात दाखल केले. दोघांची प्रकृती गंभीर असल्याचे रुग्णालयातील डॉक्टरांनी सांगितले आहे. सीसीटीव्ही फुटेजचा वापर करुन पोलीस या अपघाताचा तपास करत आहेत. ती कार कोणाची आहे? याचा शोध सुरु असल्याचे म्हटले जात आहे.