सुलतानपूर : (Sultanpur Accident) तंबाखूमुळे अनेकांना जीव गमवावा लागल्याचे आपण अनेकदा ऐकतो, मात्र एका व्यक्तीचा तंबाखूमुळे ज्या प्रकारे अंत झाला ते वाचून तुम्हालाही विश्वास बसणार नाही. एका व्यक्तीचा तंबाखूमुळे मृत्यू झाला पण त्याचे कारण कर्करोग किंवा ह्रदय विकार नाही तर चक्क अपघात होते. उत्तर प्रदेशच्या सुलतानपूरमध्ये एका प्रवाश्याने तंबाखू थुंकण्यासाठी चालत्या बसचे दार उघडले आणि खाली पडला. या अपघातात त्याचा जागीच मृत्यू झाला. 

चालत्या बसचे दार उघडणे महागात पडले

शनिवारी तंबाखू थुंकण्यासाठी चालत्या बसचे गेट उघडणे यूपीच्या सुलतानपूरमध्ये एका प्रवाशाला महागात पडले. गेट उघडून तंबाखू थुंकत असताना त्याचा तोल गेला. तो चालत्या बसमधून खाली पडला. त्याचा जागीच मृत्यू झाला. बलदिराई पोलीस स्टेशन हद्दीतील बिही गावाजवळ पूर्वांचल एक्स्प्रेस वेवर हा अपघात झाला. राम जियावान (58, रा. छत्रीक रोड, चिन्हाट, लखनौ) असे मृताचे नाव आहे. बस लखनौहून आझमगडला जात होती. अपघाताची माहिती मिळताच यूपीडीएचे जवान घटनास्थळी पोहोचले. पोलिसांनाही माहिती देण्यात आली.

पोलिसांनी घटनास्थळ गाठून घटनेची माहिती घेतली. मृतदेह पोस्टमॉर्टमसाठी पाठवण्यात आला आहे. बसचालक हरिश्चंद्र तिवारी यांनी सांगितले की, प्रवाशाने तंबाखूचे सेवन केल्यानंतर थुंकण्यासाठी बसचा दरवाजा उघडला. तोल गेल्याने तो खाली पडला. त्याचा जागीच मृत्यू झाला. उपनिरीक्षक रामदेव यांनी सांगितले की, मृतांच्या कुटुंबीयांना माहिती देण्यात आली आहे.

पोलिसांनी सुरू केला घटनेचा तपास

बलदिराईचे एसएचओ धीरज कुमार यांनी सांगितले की, पीडितेचा मुलगा आणि सून पोलिस कॉन्स्टेबल आहेत. याप्रकरणी पुढील कारवाई किंवा तपास नको असल्याचे त्यांनी लेखी दिले आहे. तथापि, पोलिस प्राथमिक तपास करतील कारण अशा मृत्यूच्या प्रकरणांमध्ये ही एक एसओपी आहे, असे एसएचओ म्हणाले. एसएचओने सांगितले की, प्रथमदर्शनी हा अपघाती मृत्यू असल्याचे दिसते. ते म्हणाले की, आम्ही इतर प्रवाशांचेही जबाब घेतले आहेत. मृत हे शेतकरी होते. ते लखनौहून आझमगडमधील आपल्या गावी जात होते. 

Edited by- नितीश गाडगे