नवी दिल्ली : आम आदमी पक्षाचे नेते आणि माजी मंत्री सौरभ भारद्वाज यांच्याशी संबंधित १३ ठिकाणांवर ईडीने छापे मारले. भारद्वाज यांच्या निवासस्थानीही ईडीने छापा टाकला. आप सरकारच्या काळात आरोग्य विभागाशी संबंधित योजनेत मोठ्या प्रमाणात भ्रष्टाचाराचा आरोप करण्यात आला होता. या आरोपाअंतर्गत आप नेते सौरभ भारद्वाज आणि सत्येंद्र जैन यांच्या विरोधात ईडीने जुलैमध्ये गुन्हा नोंदवला होता. त्यानंतर ईडीकडून कारवाईचा ससेमिरा सुरु झाला आहे.

सौरभ भारद्वाज यांच्या घरावरील ईडी छाप्यावरून माजी मुख्यमंत्री अरविंद केजरीवाल यांनी म्हटलं की, 'मोदी सरकारकडून यंत्रणाचा दुरुपयोग केल्याचं आणखी एक प्रकरण समोर आलं आहे. मोदी सरकार आम आदमी पक्षाच्या मागे लागलं आहे. मोदी सरकार ज्या प्रकारे 'आप' पक्षाला टार्गेट करतंय. त्याप्रकारे राजकीय इतिहासात कोणत्याही पक्षाच्या मागे लागलं नसेल. आप सातत्याने मोदी सरकारच्या चुकीचे धोरणे आणि भ्रष्ट कामाच्या विरोधात आवाज उचलत आहे, त्यामुळे मोदी सरकार आमचा आवाज दाबू इच्छित आहे. परंतु ते आम्ही होऊ देणार नाही'.

काय आहे प्रकरण?

ईडीकडून आपच्या कार्यकाळातील दोन तत्कालीन आरोग्य मंत्री सौरभ भारद्वाज आणि सत्येंद्र जैन यांचा ५,५९० कोटी रुपयांच्या कथित घोटाळा प्रकरणी तपास सुरु आहे. ईडीच्या माहितीनुसार, २०१८-१९ साली आम आदमी पार्टी सरकारने २४ रुग्णालयांच्या बांधकामांना एका योजनेअंतर्गत मंजुरी दिली होती.

या योजनेच्या माध्यमातून ६ महिन्यात आयसीयू रुग्णालय तयार करण्यात येणार होते. पण त्याचं काम अपूर्ण आहे. यासाठी ८०० कोटी रुपये खर्च झाले आहेत. तर आतापर्यंत ५० टक्के काम पूर्ण झालं आहे.

ईडीच्या दाव्यानुसार, तत्कालीन दिल्ली सरकारकडून लोक नायक रुग्णालयाच्या बांधकामासाठी ४८८ कोटी रुपये मंजूर झाले. पुढे तो खर्च वाढवून ११३५ कोटी रुपयांपर्यंत वाढवण्यात आला. अनेक रुग्णालयांचं बांधकाम सही न घेताच सुरु करण्यात आले. यात ११ ग्रीनफील्ड आणि १३ ब्राउनफील्ड प्रकल्पांचा समावेश आहे.