दुबईमध्ये दिवाळी साजरी करताना युएई गोल्डन व्हिसा मिळालेल्या १८ वर्षीय भारतीय विद्यार्थ्याचा मृत्यू झाला आहे. धक्कदायक म्हणजे त्याचा मृत्यू हृदयविकाराच्या झटक्याने झाला असल्याचे समोर आले आहे. या विद्यार्थ्याचं नाव वैष्णव कृष्णकुमार असून त्याच्या आकस्मित निधनाने कुटुंबियांवर दुःखाचा डोंगर कोसळला आहे.

मिळालेल्या माहितीनुसार, वैष्णव हा दुबईतील मिडलसेक्स युनिव्हर्सिटीमध्ये बीबीए मार्केटिंगच्या प्रथम वर्षात शिकत होता. मंगळवारी दुबई इंटरनॅशनल अकादमिक सिटीमध्ये दिवाळी साजरा करताना तो अचानक कोसळला.त्याला कोसळल्याचे पाहून आजुबाजूला असलेले विद्यार्थी आणि शिक्षक वैष्णव भोवती गोळा झाले. शिक्षकांनी त्याला तातडीने रुग्णालयात नेण्यात आले. परंतु डॉक्टरांनी त्याला मृत घोषित केले. वैष्णवचा मृत्यू हृदयविकाराच्या झटक्याने झाल्याचं डॉक्टर यांनी सांगितले.

कुटुंबाच्या म्हणण्यानुसार, दुबई पोलिसांचा फॉरेन्सिक विभाग पुढील तपास करत आहे. परंतु वैष्णव याला हृदयाशी संबंधित कोणताही आजार नव्हता. तो एक बुद्धिमान आणि हुशार मुलगा होता. त्याचा मृतदेह शुक्रवारी त्याच्या पालकांच्या ताब्यात देण्यात आला असून शनिवारी त्याच्यावर अंत्यसंस्कार होणार आहेत.

वैष्णवाच्या जाण्याने तो शिकत असलेल्या मिडलसेक्स विद्यापीठाने शोक व्यक्त केला आहे. तसेच त्याच्या दुर्दैवी मृत्यूनंतर कुटुंबियांवर दुःखाचा डोंगर कोसळला आहे. दरम्यान तरुणांमध्ये हृदयविकाराच्या झटक्याने मृत्यू होण्याचं प्रमाण वाढलं आहे. या मृत्यूमागे तरुणाईंची अपूर्ण झोप, जंक फूड असल्याचं तज्ज्ञाचं म्हणणं आहे.