अक्षय बडवे, साम टीव्ही

पुणे : राज्यात महिलांवर हल्ले सुरुच आहे. पुण्यात तासाभरापूर्वी कोयता गँगने एका तरुणावर वार करत त्याचा हाताचा पंजा तोडला होता. तरुणावरील हल्ल्याची घटना ताजी असताना आता एका महिलेवर हल्ला झाल्याची घटना घडली आहे. पुण्यातील नामांकित आयटी कंपनीच्या पार्किंगमध्ये महिलेवर हल्ला झाल्याची घटना घडली आहे. या घटनेने पुण्यात खळबळ उडाली आहे.

मिळालेल्या माहितीनुसार, राज्यातील महिला सुरक्षेचा प्रश्न पुन्हा एकदा ऐरणीवर आला आहे. काही महिन्यांपूर्वी पोलिसांनी शहरातील गुन्हेगारांच्या मुसक्या आवळण्यास सुरुवात केली होती. त्यानंतर आता पुन्हा एकदा गुन्हेगारांनी डोकं वर काढल्याचं दिसून येत आहे. पुण्यात दिवसभरात दुसरा जीवघेणा हल्ला झाल्याची घटना घडली आहे. पुण्यात एका महिलेवर हल्ला झाल्याची घटना आहे. पुण्यातील नामांकित आयटी कंपनीच्या पार्किंगमध्ये महिलेवर हल्ला करण्यात आल्याची घटना घडली आहे.

नेमकं काय घडलं?

पुणे शहरातील येरवडा भागातील एका कंपनीच्या पार्किंगमध्ये ही घटना आहे. महिलेवर तिच्याच सहकाऱ्याने कोयत्याने वार केले आहे. पोलिसांनी दिलेल्या प्राथमिक माहितीनुसार, सदर महिलेवर त्यांच्याच कंपनीतील व्यक्तीने वार केला आहे. या घटनेनंतर पोलिसांनी आरोपीला ताब्यात घेतलं आहे. या हल्ल्यात जखमी झालेली महिला येरवडा भागातील आय टी कंपनीच्या कॉल सेंटरमध्ये कार्यरत आहे.

या प्रकरणातील आरोपी सुद्धा त्याच कंपनीमध्ये कामाला आहे. प्राथमिक माहितीनुसार, या दोघांमध्ये काही वाद सुरू होते. या वादातूनच त्याने हे कृत्य केल्याचे समजते. आरोपीने कोयत्याने हल्ला केल्यामुळे महिला गंभीर जखमी आहे. तिला उपचारासाठी रुग्णालयात दाखल केले आहे. या प्रकरणी पोलिसांकडून तपास सुरू आहे.

पोलिसांनी काय म्हटलंय?

पोलिसांनी दिलेल्या माहितीनुसार, येरवडा पोलीस स्टेशन हद्दीतील WNS कंपनी आहे. रामवाडी येरवडा या भागात ही कंपनी आहे. या कंपनीच्या पार्किंगमध्ये आज संध्याकाळी ६.१५ वाजता त्याच कंपनीत काम करणाऱ्या शुभदा शंकर कोदारे या महिलेवर कोयत्याने वार करण्यात आले. या महिलेवर त्याच कंपनीत काम करणाऱ्या कृष्णा सत्यनारायण कनोजा याने कोयत्याने वार केले. दोघांमधील झालेल्या वादावरून धारदार हत्याराने तिच्या उजव्या कोपरावर वार करून तिला गंभीर जखमी केले. या महिलेला सह्याद्री हॉस्पिटलमध्ये उपचारासाठी दाखल करण्यात आले आहे.