संजय गडदे, साम टीव्ही

मुंबईतील जोगेश्वरी परिसरात एक धक्कादायक कौटुंबिक वादाची घटना समोर आली आहे. दारूच्या नशेत असलेल्या पत्नीने संतापाच्या भरात पतीवर चाकूने हल्ला केल्याने परिसरात खळबळ उडाली आहे.

मिळालेल्या माहितीनुसार, तक्रारदार पती मोहोम्मद रफिक कुरेशी हे प्लंबरचे काम करतात. 31 मार्च रोजी रात्री कामावरून घरी परतल्यावर त्यांची पत्नी सबा कुरेशी ही दारूच्या नशेत असल्याचे त्यांना आढळले. यावरून रोज दारू का पितेस? असा सवाल केल्यानंतर दोघांमध्ये जोरदार वाद झाला.

या वादातून संतापलेल्या पत्नीने घरातील भाजी चिरण्याच्या चाकूने पतीवर हल्ला केला. या हल्ल्यात पतीच्या हाताला आणि पायाला दुखापत झाली असून त्यांच्यावर रुग्णालयात उपचार सुरू आहेत. या प्रकरणी आंबोली पोलीस ठाणे येथे पत्नी सबा कुरेशी विरोधात गुन्हा दाखल करण्यात आला आहे. पोलिसांनी भारतीय न्याय संहितेच्या संबंधित कलमांनुसार गुन्हा नोंदवून पुढील तपास सुरू केला आहे. या घटनेमुळे परिसरात भीतीचे वातावरण निर्माण झाले असून कौटुंबिक वादाचे गंभीर रूप पुन्हा एकदा समोर आले आहे.