मीरा भाईंदर - येथील कोविड उपचार केंद्र मध्ये एका नर्सचे लपून विवस्त्र चित्रिकरण करण्याचा प्रकार समोर आला आहे. ओमप्रकाश पांडे असे या कंत्राटी कर्मचाऱ्याचे नाव असून पांडे हा लपून नर्स कपडे बदलत असताना चित्रीकरण करत असे. हा सर्व प्रकार नर्सच्या लक्षात येताच नवघर पोलीस ठाण्यात ओमप्रकाश पांडेच्या विरोधात गुन्हा दाखल करण्यात आला आहे. आरोपी सध्या फरार असून, नवघर पोलीस त्याचा शोध घेत आहेत.

हे देखील पहा -

मीरा भाईंदर मध्ये गेल्या वर्षी कोरोनाचा प्रसार होऊ नये म्हणून मीरा भाईंदर महापालिकेने गोल्डन नेस्ट जवळ असलेल्या एमएमआरडिएच्या इमारतीमध्ये कोविड अलगीकरण व उपचार केंद्र सुरू केले होते. कोरोना काळात लोकांना हे उपचार केंद्र खूप उपयोगी ठरले. मात्र याच उपचार केंद्रात नर्ससोबत हा सर्व प्रकार घडला आहे.

आपले चित्रीकरण होत असल्याचे लक्षात येताच नर्सने ओमप्रकाश पांडे याचा मोबाईल खेचून एका खोलीत बंद करून ठेवला. मोबाईलची तपासणी करताच त्यामध्ये व्हिडिओ क्लिप आढळून आले. पांडे याने व्हिडीओ व्हायरल करण्याची धमकी देखील दिली.

यानंतर नर्सने तात्काळ नवघर पोलीस स्टेशनमध्ये धाव घेत सर्व प्रकार पोलिसांना सांगितला. आरोपी ओमप्रकाश पांडे हा फरार असून त्याच्या विरोधात विनयभंगचा गुन्हा दाखल करण्यात आला आहे.

Edited By - Shivani Tichkule