Shegaon Vande Bharat Express Update : विदर्भ पंढरी म्हणून ओळख असलेल्या शेगावला वंदे भारत एक्सप्रेस ट्रेन मिळाली आहे. शेगाव हे महाराष्ट्रातील महत्त्वाचे तीर्थक्षेत्र आहे. श्री गजानन महाराज या ठिकाणी वास्तव्याला होते. शेगावमध्ये गजानन महाराजांचे भव्य मंदिर आहे. महाराष्ट्रातून अनेकजण शेगावला भेट देत असतात. विदर्भाव्यतिरिक्त पुण्याहून अनेक भाविक येथे भेट देत असतात. या भाविकांसाठी आनंदाची बातमी समोर आली आहे. शेगावला वंदे भारत एक्सप्रेस ट्रेन मिळाली आहे.

पंतप्रधान नरेंद्र मोदी यांनी ३ नव्या वंदे भारत एक्सप्रेसचा शुभारंभ करण्यात आला. पुणे-अजनी (नागपूर), बंगळुरू-बेळगाव आणि श्री माता वैष्णोदेवी कटरा-अमृतसर या ३ वंदे भारत एक्सप्रेस गाड्यांना हिरवा कंदील दाखवण्यात आला. यातील पुणे-अजनी (नागपूर) या वंदे भारत एक्सप्रेसला शेगावमध्ये थांबा मिळाला आहे. शेगावमधून वंदे भारत एक्सप्रेस जाणार असल्याने भाविकांचा प्रवास सुखकर-सुकर होणार आहे.

या वंदे भारत एक्सप्रेस ट्रेनच्या मार्गावर अजनी, नागपुर, वर्धा, बडनेरा, अकोला, भुसावळ, जळगांव, मनमाड, कोपरगांव, अहिल्यानगर, दौंड मार्गे पुणे या ठिकाणी ट्रेन थांबणार होती. विदर्भाची पंढरी अशी ओळख असललेल्या शेगाव येथे महाराष्ट्रासह देशभरातून भाविक येत असतात. तेव्हा या वंदे भारत एक्सप्रेस मार्गिकेमध्ये शेगावलाही थांबा मिळावा यासाठी केंद्रीय मंत्री प्रतापराव जाधव यांनी केंद्रीय रेल्वे मंत्री अश्विनी वैष्णव यांच्याकडे विनंती केली होती. त्यानंतर शेगावला एक्सप्रेस ट्रेन थांबणार असल्याचा निर्णय घेण्यात आला.

पुणे-अजनी (नागपूर) वंदे भारत एक्सप्रेस वर्धा ते मनमाड यांना पहिल्यांदाच वंदे भारत एक्सप्रेसची सुविधा मिळणार आहे. ही आतापर्यंतची सर्वात लांब पल्ल्याची वंदे भारत एक्सप्रेस ट्रेन आहे. ही ट्रेन ८८१ किमी अंतर पार करेल. सरासरी वेग ७३ किमी प्रतितास असलेल्या या ट्रेनला प्रवासादरम्यान १० स्थानकांवर थांबा असेल.