Vaishnavi Hagawane Case Updates : वैष्णवी हगवणे प्रकरणातील आरोपींना आज (२८ मे) न्यायालयासमोर हजर करण्यात आले. न्यायालयात वैष्णवीचा नवरा शशांक, सासू लता आणि नणंद करिष्मा यांना एका दिवसाची पोलीस कोठडी, तर वैष्णवीचे सासरे राजेंद्र आणि दीर सुशील यांना ३१ मे पर्यंत पोलीस कोठडी सुनावण्यात आली आहे. न्यायालयात हगवणे कुटुंबाच्या वकिलांनी केलेल्या युक्तिवादाची चर्चा पाहायला मिळत आहे.

'पोलीस कोठडी देण्याची काहीच गरज नाहीये, गहाण ठेवलेलं सोनं कुठल्या बँकेत आहे हे हगवणे कुटुंबाने आधीच सांगितले आहे. निलेश चव्हाणला आरोपी करणे चुकीचे असून त्याचा यात काहीच संबंध नाही. तो फक्त हगवणे यांचा नातेवाईक आहे. त्याने बाळाला सांभाळताना हेळसांड केली म्हणून त्यावर गुन्हा दाखल केला. तो चुकीचा असेल, तर त्याला फाशी द्या', असे हगवणेंच्या वकिलाने म्हटले आहे.

'वैष्णवी नको त्या व्यक्तीशी चॅट करत होती, ते आम्ही पकडले. त्याची माहिती आम्हाला हवी होती. वैष्णवीची प्रवृत्तीच आत्महत्येची होती, तिने अनेक वेळा आत्महत्येचा प्रयत्न केला आहे. नको त्या व्यक्तीने नाही म्हटले म्हणून तिने आत्महत्या केली असावी. आत्महत्या करण्याचे मुख्य कारण वेगळे आहे, त्याचा शोध आम्हाला घ्यायचा आहे', असे हगवणे कुटुंबाच्या वकिलांनी म्हटले आहे.

'४० लाख रुपयांची गाडी दिली असे ते (वैष्णवीच्या माहेरचे) म्हणतात, आमच्या घरात ५ कोटी रुपयांच्या गाड्या आहेत. आम्ही चाळीस लाखांच्या फॉर्चुनरसाठी कशाला त्रास देऊ', असे म्हणत हगवणे कुटुंबाची बाजू त्यांचे वकील विपुल दोशी यांनी मांडली आहे. चॅट करणाऱ्या व्यक्तीने त्रास दिला असावा म्हणून तिने आत्महत्या केली असावी असा दावा दोशी यांनी केला आहे.