अभिजित देशमुख, कल्याण प्रतिनिधी

कल्याण डोंबिवली महानगरपालिका मुख्यालयात आणि छत्रपती शिवाजी महाराज चौक परिसरात आज दुपारी अचानक सायरन वाजल्याने नागरिकांमध्ये भीतीचं वातावरण निर्माण झालं. कुठलीही पूर्वसूचना न देता वाजवलेल्या या सायरनमुळे परिसर काही वेळासाठी नागरिकांची मात्र चांगलीच धावपळ झाली .काही क्षणातच सायरन टेस्टिंग साठी वाजवण्यात आल्याचं समजलं. मात्र अशा प्रकारे अनपेक्षित सायरन वाजवणं चुकीचं असल्याचं म्हणत नागरिकांनी नाराजी व्यक्त केली आहे.

कल्याण डोंबिवली महानगरपालिका मुख्यालय आणि त्यालगतचा शिवाजी चौक परिसर आज दुपारी अचानक सायरनच्या आवाजाने हादरला. नागरिक, कर्मचारी आणि स्थानिक व्यापारी घाबरून गेले आणि काही क्षणांतच परिसरात गोंधळ व धावपळ सुरू झाली. पालिका आवार काही वेळासाठी पूर्णपणे रिकामा झाला.घटनेनंतर सुरक्षारक्षकांना विचारले असता, दररोज चार वाजता सायरन टेस्टिंग केलं जातं, अशी माहिती त्यांनी दिली. मात्र या बाबत कुठलीही पूर्वसूचना नागरिकांना देण्यात आली नव्हती.

नागरिकांनी यावर तीव्र प्रतिक्रिया व्यक्त केली. "अचानक सायरन वाजल्यावर काहीतरी आपत्ती आली की काय असं वाटलं. सायरनचा नेमका अर्थ काय हे आम्ही समजायचं तरी कसं?" असा सवाल उपस्थित करत पालिकेने माध्यमांतून किंवा सूचना फलकांवर ही टेस्टिंग आहे, हे स्पष्ट करावं, अशी मागणी केली."जर दररोजच टेस्टिंग करणार असाल, तर वेळ आणि कारण स्पष्ट करा. अनावश्यक गोंधळ टाळण्यासाठी प्रशासनाने जबाबदारीने काम करावं," अशी प्रतिक्रिया अनेक नागरिकांनी दिली आहे.