अजय दुधाणे, साम टीव्ही

उल्हासनगरमध्ये एक धक्कादायक घटना घडली आहे. एका ५५ वर्षीय व्यक्तीवर चाकूने हल्ला करण्यात आला आहे. किरकोळ कारणावरून हा चाकू हल्ला झाल्याची माहिती समोर आली आहे. जखमी व्यक्तीवर कळवा येथील छत्रपती शिवाजी महाराज रुग्णालयात उपचार सुरू असून, त्यांची प्रकृती स्थीर असल्याची माहिती आहे. घटना घडल्यानंतर पोलिसांनी आरोपीला अटक केली आहे.

कल्लन शेख असे आरोपीचे नाव आहे. तो कुख्यात गावगुंड असल्याची माहिती आहे. अफसर शेख हे पीडित व्यक्ती आहेत. अफसर शेख हे उल्हासनगर येथील साईनाथ कॉलनीत वास्तव्यास असल्याची माहिती आहे. गुरुवारी दुपारी आरोपी कल्लन अफसर यांच्या घराबाहेर जाऊन उभा राहीला. त्याने अफसरकडे शेवया मागितल्या.

अफसर आणि त्याच्या कुटुंबाने शेवया देण्यास नकार दिला. शेवया देण्यास नकार दिल्यामुळे कल्लनला राग अनावर झाला. त्याने थेट अफसर यांच्या अंगावर चाकूने सपासप वार केले. यात अफसर गंभीर जखमी झाल्याची माहिती समोर आली आहे. या घटनेची माहिती मिळताच पोलीस घटनास्थळी पोहोचले. तसेच अफसरला उल्हासनगरच्या मध्यवर्ती रुग्णालयात दाखल केले.

प्रकृती गंभीर झाल्यानंतर अफसरला कळव्याच्या छत्रपती शिवाजी महाराज रुग्णालयात उपचारासाठी हलवण्यात आले. नंतर पोलिसांनी अफसर आणि त्याच्या कुटुंबाने दाखल केलेल्या तक्रारीनुसार, हल्लेखोर कल्लन शेखला हिललाईन पोलिसांनी अटक केली आहे. तसेच घटनेचा अधिक तपास पोलीस करीत आहेत. या घटनेनंतर परिसरात काहीकाळ भीतीचे वातावरण निर्माण झाले होते.