अजय दुधाणे, उल्हासनगर

उल्हासनगरमधील एका चोरीच्या घटनेची सध्या जोरदार चर्चा होत आहे. एक चोरटा नग्न होऊन मोबाईलच्या दुकानात घुसला. त्याने मोबाईल, हेडफोन आणि रोख रक्कम चोरून नेली. संतापजनक बाब म्हणजे जाता जाता या चोरट्याने मोबाईलच्या दुकानातच टॉयलेट केली त्यानंतर तो तिथून निघून गेला. हा चोरटा दुकानातील सीसीटीव्हीमध्ये कैद झाला आहे. त्याचा हा सीसीटीव्ही व्हिडीओ व्हायरल होत आहे.

उल्हासनगर कॅम्प ५ च्या गायकवाड पाडा परिसरात घडलेली ही घटना सीसीटीव्ही कॅमेऱ्यात कैद झाली आहे. याठिकाणी सुनील गुप्ता यांचे ओम साई राम कम्युनिकेशन हे दुकान आहे. मध्यरात्रीच्या सुमारास एका अज्ञात चोरट्याने दुकानाचे पत्रे उचकटून दुकानात प्रवेश केला. धक्कादायक बाब म्हणजे हा चोर संपूर्ण नग्न अवस्थेत होता. दुकानात असलेल्या सीसीटीव्हीत तो कैद झाला.

दुकानातील २ मोबाईल, हेडफोन आणि रोख रक्कम असा मुद्देमाल घेऊन हा चोरटा पसार झाला. जाताना या चोराने दुकानातच बसून शौच केले. त्यामुळे संताप व्यक्त केला जातोय. या प्रकरणी अंबरनाथच्या शिवाजीनगर पोलिस ठाण्यात गुन्हा दाखल करण्यात आला असून पोलिस अधिक तपास करत आहेत. सध्या या चोरीच्या घटनेची उल्हासनगरमध्ये चांगलीच चर्चा रंगली आहे. पोलिस या चोरट्याचा शोध घेत आहेत.