अजय दुधाणे, अंबरनाथ प्रतिनिधी

Ambernath ITI speed breaker accident details : अंबरनाथमध्ये शनिवारी रात्री उशिरा भीषण अपघात झाला. आयटीआयसमोर असलेल्या स्पीड ब्रेकरमुळे तरूणाची दुचाकी जोरात आदळली अन् दोन जण दूर फेकले गेले. गंभीर जखमी अवस्थेत त्यांना रूग्णालयात दाखल करण्यात आले. पण उपचारापूर्वीच त्यांचे निधन झाले.

अपघाताच्या या घटनेनंतर परिसरात खळबळ उडाली आहे. स्पीड ब्रेकरमुळे त्या ठिकाणी अनेक अपघात झाल्याचे स्थानिकांनी सांगितले. आयटीआयसमोर असणारा स्पीड ब्रेकर व्यवस्थित दिसत नसल्यामुळे त्या ठिकाणी अपघाताच्या घटना वारंवार घडत असल्याचे स्थानिकांनी सांगितले.

अंबरनाथ येथील आयटीआय समोर असलेल्या स्पीड ब्रेकरवर शनिवारी रात्री सुमारे अकरा वाजता भीषण अपघात झाला. या अपघातात दोन तरुण गंभीर जखमी झाले होते. मात्र रुग्णालयात पोहोचेपर्यंत दोघांचा मृत्यू झाला. मृत तरुणांची नावे पवन हमकारे (वय 23) आणि प्रणव बोरक्ले (वय 17) अशी आहेत. मृत दोन्ही तरूण हे मुरलीधर नगरचे रहिवासी आहेत. अपघाताची माहिती मिळताच पोलिसांनी तात्काळ घटनास्थळी धाव घेतली. जखमींना रूग्णालयात पाठवले अन् रस्त्यावरील अपघातग्रस्त वाहन बाजूला केले. पोलिसांकडून या अपघाताची नोंद करण्यात आली आहे.

अपघाताच्या भीषण घटनेनंतर रुग्णालयात उशिरा पोहोचल्यामुळे नातेवाईकांनी संताप व्यक्त करत पोलिसांसोबत गोंधळ घातला. अंबरनाथ आयटीआय समोर कल्याण–बदलापूर महामार्गावर असलेला स्पीड ब्रेकर नीट दिसत नसल्याने हा अपघात घडल्याचे बोलले जात आहे. अपघातानंतर उल्हासनगरच्या मध्यवर्ती रुग्णालयात नातेवाईकांची मोठी गर्दी झाली होती. आयटीआयसमोरील स्पीड ब्रेकरवर वारंवार अपघात होत असल्याच्या तक्रारी स्थानिकांनी केल्या आहेत. त्या स्पीड ब्रेकरसाठी वेगळा पर्यायाचा विचार करण्यात यावा, अशा सूचनाही अनेकदा करण्यात आल्या आहेत. पण अद्याप कोणतीही उपाययोजना करण्यात आलेली नाही. स्पीड ब्रेकरमुळे दोन तरूणांचा नाहक बळी गेल्याने स्थानिकांमध्ये संताप आहे.