नवीन वर्षाला आता काहीच दिवस उरले आहेत. नवीन वर्षाचे आगमन आणि ख्रिसमसमुळे यांमुळे मोठी सुट्टी मिळाली आहे. सुट्टी मिळताच आपण फिरण्याचे प्लान करायला लागतो. या सुट्ट्यांमध्ये पर्यटन स्थळे गजबजलेली पाहायला मिळतात. याची सुरुवात आता झाली आहे. सुट्ट्यांमध्ये पर्यटकांचा पुण्याकडे ओढ वाढला आहे.

सलग सुट्ट्या आल्याने पुण्यातील पर्यटन स्थळांवर मोठी गर्दी झालेली पाहायला मिळत आहे. मिळालेल्या माहितीनुसार पुरातत्व विभागाने रोखीचे व्यवहार आणि डिजिटल व्यवहाराद्वारे तिकीट विक्री सुरू ठेवण्याऐवजी फक्त डिजिटल तिकीट विक्री सुरू केली आहे. यामुळे एकाच वेळी हजारो पर्यटक प्रवेशद्वारावरच खोळंबून मोबाईलवरून तिकीट काढण्यासाठी माहिती घेताना पाहायला मिळत आहे. यामुळे पर्यटकांना खूप मनस्ताप सहन करावा लागणार आहे.

पुणे हे विद्येचे माहेरघर आहे. तर पुण्याला ऐतिहासिक वारसा लाभला आहे. पुण्यात शनिवारवाडा, पाताळेश्वर लेणी, आगाखान पॅलेस, पर्वती, नाना वाडा, दगडूशेठ हलवाई गणपती, कसबा गणपती, जोगेश्वरी मंदिरांसह सर्व ठिकाणी पर्यटकांनी गर्दी पाहायला मिळत आहे. ही सर्व स्थळे पर्यटकांचे आकर्षण आहे. पुण्यात विशेष म्हणजे तीन दिवसांत तब्बल 15 हजार पर्यटकांनी शनिवार वाड्याला (Shaniwar Wada) भेट दिली आहे. अशी माहिती शनिवार वाडा प्रशासनाकडून देण्यात आली आहे.

पुण्यातील विविध पर्यटन स्थळे, मंदिरे, बागा पर्यटकांच्या गर्दीने फुलल्या आहेत. श्रीमंत दगडूशेठ हलवाई गणपती परिसरात दर्शनासाठी भाविकांची मोठी गर्दी पाहायला मिळत आहे. तसेच पर्यटक उत्साहाने फोटो आणि व्हिडीओ काढण्याचा आनंद घेताना पाहायला मिळत आहेत. पुण्याला वीकेंडला खूप गर्दी पाहायला मिळत आहे. परदेशी पर्यटकही शनिवार वाडा पाहण्यासाठी उत्सुक दिसत आहेत.