उत्तरेकडील शीत वारे मंदावल्यामुळे राज्यात थंडीचा कडाका कमी झाला आहे. मात्र थोड्या अधिक प्रमाणात वातावरणात गारठा कायम आहे. किमान तापमानात हळूहळू वाढ होत असून, काही ठिकाणी पहाटे धुके तर दुपारी तीव्र ऊन पाहायला मिळत आहे. आज राज्याच्या किमान तापमानात काही अंशी वाढ होण्याची, तसेच थंडी कायम राहण्याची शक्यता हवामान विभागाने वर्तवली आहे.

किमान तापमानाचा पारा १० अंशांच्या खाली आल्यास तसेच तापमानात सरासरीच्या तुलनेत ४.५ अंशांची घट झाल्यास थंडीचा लाट, तर तापमानात ६.५ अंशांपेक्षा अधिक घट झाल्यास तीव्र लाट आल्याचे समजले जाते. गुरुवारी गोंदीया येथे ८.४ अंश, अहिल्यानगर येथे ८.६ तर नांदेड येथे ८.९ अंशाची नोंद झाली आहे.

तसेच मराठवाड्यातील अनेक भागात किमान तापमानात घट झाली आहे. राज्यातील मालेगाव, नाशिक, मोहोळ, जळगाव, यवतमाळ येथे १० अंशाच्या खाली तापमान होते. आज राज्याच्या किमान तापमानात चढ-उतार होत, थंडी कायम राहण्याची शक्यता हवामान विभागाने वर्तवली आहे.

छत्रपती संभाजीनगरमध्ये आज सकाळी तापमानाचा पारा हा दहा अंश सेल्सिअसच्या खाली गेलेला जाणवला. सकाळपासून थंडीचा गारठा वाढल्यामुळे शेकोट्या पेटलेल्या दिसत आहे. मागच्या आठवड्यात अचानक थंडीचा कडाका वाढला होता. त्यानंतर पुन्हा थंडी कमी झाली होती. आज पुन्हा वाढ होऊन आज सकाळपासून थंडी अधिक जाणवू लागली आहे. पुढील काही दिवस अशीच थंडी राहणार असल्याचा हवामान विभागाचा अंदाज आहे. दरम्यान राज्यातील तापमानात सतत होणारा बदल नागरिकांना तापदायक ठरत आहे. बदलत्या वातावरणामुळे नागरिकांना सर्दी, खोकल्यासारख्या आजारांना सामोरे जावं लागतं आहे.