राज्यात थंडीची गुलाबी चादर पसरली असून काही ठिकाणी अंशतः तापमानात वाढ झाली आहे. त्यामुळे सकाळी हुडहुडी आणि दुपारी उन्हाचा कडाका कायम आहे. आकाश निरभ्र होत असून तापमानात चढ-उतार होत आहेत. पुढील तीन ते चार दिवस किमान तापमानातील वाढ कायम राहील. त्यानंतर पुन्हा गारठा वाढण्याचे संकेत हवामान विभागाने दिले आहेत.

महाराष्ट्रात काही ठिकाणी तापमानाचा पारा वाढला असून गारवा कमी झाला आहे. तर काही ठिकाणी हुडहुडी कायम आहे. मध्य महाराष्ट्र, मराठवाडा, विदर्भात गारठा कायम असला, तरी किमान तापमानात वाढ झाली आहे. अनेक ठिकाणी पारा १० अंशांच्या पुन्हा वर गेला आहे. पहाटे थंडी सोबतच धुकं दिसतं असून हवेत थंडी जाणवत आहे.

मुंबई, पुणे, ठाणे, पालघर, जळगाव, नाशिक, निफाड, बीड, अहिल्यानगर, कोल्हापूर, माथेरान या ठिकाणी कडाक्याची थंडी पडली आहे. निफाड येथील गहू संशोधन केंद्रात राज्यातील नीचांकी ८.६ अंश तापमानाची नोंद झाली. धुळे येथील कृषी महाविद्यालयात ८.७ अंश सेल्सिअस, तर भंडारा येथे पारा १० अंशांवर आल्याने गारठा कायम आहे.

काल म्हणजेच गुरुवारी कोकणातील रत्नागिरी येथे ३४.५ अंश सेल्सिअस कमाल तापमानाची नोंद झाली. दरम्यान दुपारच्या वेळेस उन्हाचा चटका जाणवत असून, उकाड्यात काहीशी वाढ होत आहे. आज राज्यातील किमान तापमानात वाढ होणार असून थंडी कायम राहण्याचा अंदाज हवामान विभागाने वर्तविला आहे. सतत बदलत राहणाऱ्या हवामानाने नागरिकांना त्रस्त केलं आहे.