शिवाजी काळे, नवी दिल्ली

Maharashtra Politics: महाराष्ट्राच्या सत्तासंघर्षाची सुनावणी सर्वोच्च न्यायालयाकडून पुढे ढकलण्यात आली आहे. आता २९ नोव्हेंबरला ही सुनावणी (Hearing In Supreme Court) होणार आहे. राज्यातील सत्तासंघर्ष, शिवसेनेतील फूट आणि १६ आमदारांची अपात्रता अशा अनेक मुद्द्यांवर सर्वोच्च न्यायालयात (Supreme Court) ही सुनावणी होणार होती. न्यायमूर्ती डॉ. धनंजय चंद्रचूड यांच्या अध्यक्षतेखालील पाच सदस्यीय घटनापीठापुढे आज सुनावणी होणार होती.  या घटनापीठात न्यायमूर्ती एम. आर. शहा, न्यायमूर्ती कृष्ण मुरारी, न्यायमूर्ती हिमा कोहली आणि न्यायमूर्ती पी. एस. नरसिंह यांचा या घटनापीठात समावेश होता. मात्र आता ही सुनावणी २९ नोव्हेंबर रोजी होणार आहे. (Maharashtra political Latest News)

मिळालेल्या माहितीनुसार, दोन्ही पक्षकारांना कागदपत्रं सादर करण्याचे निर्देश सुप्रीम कोर्टाकडून देण्यात आले. दोन्ही बाजूच्या वकिलांना एकत्र बसून चर्चा करण्याचे तसेच दोन्ही बाजू लेखी स्वरूपात मांडण्याचे आदेश सुप्रीम कोर्टाने दिले आहेत. तसेच दोन्ही पक्षकारांना 4 आठवड्यांची मुदत देण्यात आली आहे. या सत्तासंघर्षावरील पुढील सुनावणी 4 आठवड्यांनी सुप्रीम कोर्टात 29 नोव्हेंबरला होणार आहे.

शिवसेनेत फूट पडल्यानंतर शिंदे आणि ठाकरे गटाने पक्षावर हक्क सांगितला आहे. त्यामुळे पक्षचिन्हाची लढाई ही निवडणूक आयोग ते सुप्रीम कोर्टापर्यंत पोहोचली आहे. याप्रकणी आधी झालेल्या सुनावणीत 'खरी शिवसेना कोणाची', याचा निवाडा भारतीय निवडणूक आयोग करेल, असं सुप्रीम कोर्टाच्या घटनापीठाने म्हटलं होतं.

पक्षचिन्हाचा निर्णय निवडणूक आयोगाकडून केला जाणार असला तरी आमदारांच्या अपात्रतेबाबत आणि सत्तासंघर्षावेळी निर्माण झालेल्या इतर कायदेशीर पेचांबाबत मात्र सुप्रीम कोर्टातच फैसला होणार आहे. आज सुनावणी थोडक्यात आवरली असून 29 नोव्हेंबरला या संदर्भात सुनावणी होणार आहे.

Edited By - Akshay Baisane