Ayodhya Paul: शिवसेनेच्या (उद्धव बाळासाहेब ठाकरे) महाराष्ट्र सोशल मीडिया समन्वयक अयोध्या पोळ यांच्यावर शाईफेक झाल्याची घटना घडली आहे. ही घटना कळव्यात घडल्याची माहिती मिळत आहेत.

अयोध्या पोळ यांनी स्वतः फेसबुकवर एक पोस्ट शेअर करत याबाबत माहिती दिली आहे. यासोबतच त्यांनी शाईफेकनंतर त्यांचा फोटोही पोस्ट केला आहे. ''आजोळी आले अन सन्मान झाला,'' असं त्यांनी आपल्या पोस्टमध्ये लिहिलं आहे. (Latest Marathi News)

मिळालेल्या माहितीनुसार, अयोध्या पोळ या कळव्यात एका कार्यक्रमासाठी आल्या होत्या. यावेळी त्यांना काही जणांच्या टोळक्याने घेरले आणि शाईफेक केली, असं सांगण्यात येत आहेत. याबाबत अयोध्या या स्वतः लवकरच माहिती देणार असल्याचं त्यांनी आपल्या फेसबुक पोस्टमध्ये सांगितलं आहे.

कोण आहेत अयोध्या पौळ?

शिवसेनेचे हिंगोलीचे आमदार संतोष बांगर यांना आव्हान दिल्यानंतर अयोध्या पोळ या चर्चेत आल्या होत्या. अयोध्या पोळ पाटील या मूळच्या परभणी जिल्ह्यातल्या आहेत. अयोध्या यांनी प्राथमिक आणि माध्यमिक शिक्षण गावातच पूर्ण केलं. त्यानंतर पदवीपर्यंतचं शिक्षण मुंबईत झालं. गेली 12 वर्षांपासून त्या मुंबईतच राहतात.

अयोध्या यांना लहानपणापासून शिवसेनेचं बाळकडू मिळालं आहे. त्यांच्या आई म्हणजेच गंगूबाई या शिवसेनेच्या पालम तालुका प्रमुख होत्या. बाल शिवसैनिक ते युवा सेना असा त्यांचा प्रवास झाला आहे.